Регион
Турција ги обвини САД за мешање во изборите: „Бајден стои зад сè“

Турскиот министер за внатрешни работи, Сулејман Сојлу, ги обвини САД за мешање во изборите во Турција.
„САД се мешаат во нашите избори. Тоа веќе го знаат сите во оваа земја, а тоа го изјави и самиот американски претседател Џозеф Бајден. Јасно е од каде дојде нападот врз кандидатот Мухарем Инџе, како и каде беше координиран. Тоа е Америка во последните денови, господинот Бајден го активира својот народ во Турција“, вели Сојлу.
Тој во изјава за весникот „Стар“ додаде дека САД редовно се мешаат во изборите во Турција, дека тоа го прават на разни начини, вклучително и со монтирани видеа.
„Што им направи Мухарем Инџе, тие воопшто немаат гризење на совеста“, рече Сојлу.
Според него, зад сите овие активности против Турција стои американскиот претседател Џозеф Бајден.
„Тој е тој што вели дека кога не успеаја да го соборат Ердоган со државен удар во 2016 година, тогаш тоа ќе го направат со мешање во изборите“, рече тој.
Сојлу смета дека Вашингтон не сака реизбор на Ердоган, туку избор на Киличдароглу, кој, според идејата на Американците, треба да ги освои гласовите на Инџе.
„Оние на кои не им се допаѓаат некои од нашите стратегии одат на другата страна, ФЕТО (организацијата на свештеникот Фетула Ѓулен, кој живее во САД, и со која Анкара го поврзува обидот за пуч) е сè уште активна. На пат кон претседателските избори се спроведува операција против кандидатите“, објасни Сојлу.
Претседателските избори во Турција ќе се одржат на 14 мај. Претходно, турскиот претседателски кандидат Мухарем Инџе се повлече од претседателската трка стеснувајќи го полето на ривалите на актуелниот претседател Реџеп Таип Ердоган и внесувајќи нова неизвесност за кого сега ќе гласаат неговите поддржувачи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Се уште трае потрагата по хрватските планинари заробени од лавина на словенечките Алпи

Потрагата по двајцата исчезнати хрватски планинари во Јулиските Алпи продолжи утрово кратко по 7 часот, потврди Словенечката планинска служба за спасување за хрватски Индекс.
Вчера наутро, под врвот Тошќ во Јулиските Алпи беше предизвикана снежна лавина, при што беа затрупани тројца хрватски планинари.
За време на тешкото пребарување и спасување, еден планинар беше пронајден без знаци на живот, додека двајцата мажи сè уште се бараат.
Во потрагата денес е вклучен и хеликоптер.
Екипите веќе тргнаа кон локацијата, но точниот број на вклучени спасувачи сè уште не е познат.
Службата додава дека денешното време дозволува распоредување на хеликоптер, но условите во планините се сè уште нестабилни и постои ризик од нови лавини. Идентитетите на загинатиот планинар и двајцата исчезнати сè уште не се официјално потврдени, но неофицијално хрватските медоуми објавија дека двајцата мажи по кои се трага се браќа.
Шеф на спасувачката служба: Ситуацијата е сложена и опасна
Заменик-шефот на Словенечката планинска спасувачка служба, Клемен Белхар, изјави за ХРТ дека во областа има околу половина метар снег, што не звучи како многу, но создава висок ризик од лавини. Тој додаде дека во планините сè уште има групи алпинисти кои ќе бидат спасени денес и утре.
„Ситуацијата е доста сложена и опасна“, рече Белхар. На прашањето дали има надеж дека преостанатите двајца Хрвати по кои сè уште се трага се сè уште живи, тој одговори: „Секако ќе се однесуваме како да се живи, но колку надеж има, никој не знае“.
Регион
Трагедија во Србија: се преврте чамец во Дунав, има жртви

Брод со неколку лица се преврте синоќа во Дунав кај Бачка Паланка, во соседна Србија.
Како што јавуваат спрските медиуми, во несреќата има жртви и повредени.
На бродот имало 11 лица, 10 кинески државјани и еден српски државјанин, за кој се верува дека го управувал бродот. Според неофицијални информации, станува збор за обид за нелегално преминување на државната граница.
Досега се пронајдени осум лица – шест кинески државјани беа спасени од хрватски спасувачи, додека спасувачите од Србија пронајдоа еден преживеан и едно тело.
Потрагата по останатите исчезнати лица сè уште е во тек. Повеќе информации ќе бидат познати по официјалното соопштение од надлежните органи.
Регион
(Видео) Во Црна Гора убиен член на Шкаљарскиот клан: телото пронајдено во автомобил

33-годишниот Бобан Сјеклоќа беше убиен вчера околу 18 часот во продолжението на војната меѓу црногорските кланови. Телото на овој висок член на ќелијата Цетиње на Шкаљарскиот клан беше пронајдено во кај плажата Трстено во близина на Будва во автомобил „голф“ со регистарски таблички од Подгорица.
Вишата државна обвинителка Ана Радовиќ потврди за црногорски Вјести дека за време на истрагата се пронајдени неколку чаури и дека наредила вештачење на запленетите траги. „Жртвата е идентификувана како Б.С. (33). За време на истрагата се пронајдени одреден број траги и чаури, кои ќе бидат испитани во Центарот за судска медицина“, рече таа.
Извор близок до истрагата за Вјести изјави дека телото го пронашле пожарникари кои биле известени околу 18 часот дека автомобилот излетал од патот. Тој истакна дека мажот бил застрелан преку шофершајбната. Сјеклоќа со години бил во бегство. Според полициските податоци, тој бил важна алка во ќелијата на криминалниот клан Шкаљари во Цетиње.
Специјалното државно обвинителство го обвини за шверц на половина тон кокаин и помагање во ликвидацијата на Андрија Газивода и Перо Мухадиновиќ во Цетиње во 2020 година. Полицијата неколку пати ја претресе неговата куќа во Цетиње, но не го пронајде за време на овие операции.
За потсетување, Шкаљарскиот и Кавачкиот клан се во судир со години. Крвавиот конфликт започна кон крајот на 2014 година поради исчезнувањето на 200 килограми кокаин од стан во Валенсија, што доведе до поделба на некогаш обединетиот криминален клан на два завојувани табора.
фото: принтскрин