Регион
Турција го повика Косово да не отвора амбасада во Ерусалим
Турција ги повика властите на Косово да се откажат од намерата за отворање амбасада во Ерусалим бидејќи тоа го нарушува историскиот и правниот статус на Ерусалим и ѝ штети на палестинската кауза, а може и да го загрози процесот на признавање на Косово од трети држави, пренесува „Анадолија“.
Бројни одлуки на ОН наведуваат дека решението за блискоисточната криза е можно само со воспоставување на независна палестинска држава со границите од 1967 година и со Источен Ерусалим како главен град.
Турското Министерство за надворешни работи соопшти дека од пораките на косовскиот претседател, премиер, шеф на дипломатијата и други официјални лица е јасно дека Косово и Израел планираат меѓусебно признавање и дека Косово планира да отвори амбасада во окупираниот Ерусалим.
Во саботата косовскиот претседател Хашим Тачи објави на Твитер: „Ја поздравувам изјавата на израелскиот премиер Бенјамин Нетанјаху за искрената намера да го признае Косово и да воспостави дипломатски односи. Косово ќе го одржи ветувањето дека ќе ја отвори својата дипломатска мисија во Ерусалим “.
И премиерот Авдулах Хоти, исто така на Твитер, ја повтори заложбата.
Турција посочи дека е разочарувачки што Косово како мнозински муслиманска земја размислува за таков чекор, кој претставува јасно и грубо кршење на меѓународното право и резолуциите на ОН.
Потсетувајќи дека токму Турција беше меѓу првите земји што ја признаа независноста на Косово во 2008 година и дека го поддржала признавањето на Косово на меѓународната сцена, во соопштението од Анкара се наведува дека Турција смета дека таквиот процес не треба да продолжи со кршење на меѓународното право и маката на палестинскиот народ, чија земја е окупирана.
„Ги повикуваме лидерите на Косово да ги почитуваат тие одлуки и да го избегнат чекорот што го нарушува правниот и историскиот статус на Ерусалим и кој би можел да биде идна пречка за признавање на Косово од страна на други земји“, се наведува во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Ужас во Загреб: пронајдено тело во автомобил во одводен канал
Граѓани попладнево во одводен канал во Загреб пронашле возило со тело на непознато лице, соопшти полицијата.
Повикот во полиција стигнал нешто по 13 часот.
Полицијата набрзо пристигнала на локацијата меѓу Антуновац и Тења и потврдила дека лицето во возилото починало, пишува Вечерњи лист.
Истрагата е во тек.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.