Регион
Уапсен и вујкото на осомничениот за масовното убиство кај Младеновац

Вујкото на Урош Блажиќ, кој ги изврши масовните убиства во Младеновац и Смедерево, е уапсен поради сомнение дека сторил кривично дело недозволено изработување, држење, носење и тргување со оружје и распрскувачки материјали.
На Г.Г. (49) му е одредена мерка притвор во траење од 48 часа, соопштија од Вишото јавно обвинителство Смедерево.
Тој е уапсен врз основа на нови факти утврдени во истрагата која е во тек против Урош и неговиот татко, со цел да се утврдат и расветлат сите околности во врска со потеклото на оружјето со кое обвинетиот ги извршил кривичните дела кои му се товарат.
Г.Г. заедно со кривичната пријава ќе биде донесен на распит во просториите на Вишото јавно обвинителство во Смедерево.
Урош е осомничен за сторени кривични дела тешко убиство, недозволено изработување, држење, држење и тргување со оружје и распрскувачки материјали, грабнување и неовластено користење туѓо возило. При претрес на куќа и викендица сопственост на осомничениот, пронајдено е поголемо количество оружје.
Во викендица се пронајдени карабин со оптика, пиштол, сигнален пиштол, два пригушувачи, ловечки нож и други делови за оружје, 164 куршуми различен калибар, 13 ловечки патрони, 12 чаури, 4 сигнални куршуми и 25 парчиња карабинска муниција.
При претресот на куќата и помошниот објект во населба Вињиште, полицијата пронашла четири рачни бомби, неколку кутии пиштолска муниција, неколку парчиња муниција за пушка, рамка за пиштол, две рамки најверојатно за автоматска пушка, носач за оптика, како и автоматска пушка без сериски број.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Ќе се сретнам двапати со Трамп во наредните денови

Претседателот на Србија, Александар Вучиќ, синоќа изјави дека во следните три до четири дена ќе се сретне двапати со претседателот на Соединетите Американски Држави, Доналд Трамп, јавува Анадолу.
„Ќе се сретнам двапати, од различни причини, во следните четири дена. Не ми верувајте на збор, ги измешав датумите и временските зони“, рече Вучиќ за време на обиколката на работите во новата детска клиника „Тиршова 2“, одговарајќи на новинарско прашање за тоа кога ќе се сретне со американскиот претседател, додавајќи дека „сè ќе се случи во следните три или четири дена“.
Тој, исто така, најави дека очекува италијанската премиерка Џорџa Мелони да го посети Белград во август или септември, која ја опиша, заедно со претседателката на Европската комисија, Урсула фон дер Лајен, како една од најмоќните жени во светот.
Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.
Регион
Не успеа ниту новиот обид за избор на претседател на косовското собрание

Собранието на Косово и енеска не го избра Аљбуљен Хаџиу за претседател на собранието.
При гласањето Хаџиу доби поддршка од 54 пратеници, 44 беа против, а три лица беа воздржани.
За него гласаа пратениците на Самоопределување, како и пратениците на малцинските заедници, освен Адем Хоџа, кој гласаше против.
На седницата не учествуваше пратеничката Дуда Баље, која досега гласаше против.
Против гласаа членовите на Демократската партија на Косово, Демократскиот сојуз на Косово и Алијансата за иднината на Косово.
Претставниците на досегашната опозиција, по седницата, изјавија дека сè ова личи на театар и ја обвинија победничката партија дека намерно го спречува конституирањето на парламентот бидејќи нема гласови за формирање на новата влада на Косово.
Од друга страна, Самоопределување ги обвини пратениците на поранешната опозициска партија дека го блокираат нивниот предлог.
Продолжението на конститутивната седница на косовскиот парламент е закажано за 1 мај.