Регион
„Фајненшел тајмс”: Белград се откажа од државјанствата за Руси по заканите од ЕУ
Србија се откажа од плановите за издавање пасоши на Руси и на други странски државјани што живеат во земјата повеќе една година откако ЕУ предупреди дека може да ѝ го укине безвизниот режим, пренесува „Фајненшл тајмс“.
Во моментот странците мора да живеат во Србија најмалку пет години пред да имаат право да побараат државјанство. Но, во нацрт-законот што српската влада го претстави во април беше прецизирано дека за издавање српски пасош на странски државјани, кои работат во локални фирми или се самовработени, ќе биде доволна една година привремен престој.
Европската комисија предупреди дека го следи безвизниот режим со Србија за да ги спречи и да ги ублажи можните безбедносни ризици за ЕУ. Од таму лани му биле испратени јасни препораки на Белград да ги укине или да се воздржи од усвојувањето шеми за инвеститорско државјанство.
„Ако некое државјанство доделено според шемите за државјанство на инвеститори претставува зголемен ризик за внатрешната безбедност и за јавната политика на земјите членки на ЕУ, бесплатниот визен режим со Србија може да биде суспендиран“, се вели во соопштението на ЕК испратено до „ Фајненшл тајмс“.
Во текот на минатата година Брисел неуспешно се обиде да изврши притисок врз Белград да воведе санкции кон Русија, да ги забрани директните летови од земјата до Руската Федерација и да им дава засолниште на руските компании и поединци што сакаат да ги избегнат западните забрани за патување и замрзнување на имотот.
Според неименуван советник во владата на Србија, предлог-законот за полесно и побрзо стекнување државјанство е само предлог што не бил прифатен, а неговата функција била да привлече висококвалификувани работници со цел да се стимулира економија на Србија.
Имајќи предвид дека на социјалните мрежи во рускојазичното подрачје во последните неколку недели одекнува веста за можни законски измени за добивање српски пасош, се очекува нов бран руски емигранти што сакаат да се преселат во Србија со надеж потоа да се преселат во други европски градови.
Набљудувачите на Балканот прогнозираат дека српската влада, најверојатно, ќе го повлече предлогот поради притисокот од ЕУ бидејќи на Србија ѝ требаше многу напор да издејствува либерализација на визниот режим во 2009 година.
Во исто време владата во Белград, најверојатно, ќе бара да ги продолжи дозволите за престој на речиси 200.000 Руси, кои пристигнале во земјата од февруари 2022 година.
Европската комисија ги повика на крајот на март земјите членки на ЕУ веднаш да ги откажат сите постојни шеми за издавање т.н. златни пасоши и да размислат за укинување на државјанствата дадени на руски и белоруски граѓани, кои се на листата на санкции на ЕУ поради војната во Украина. Т.н. шеми за златни пасоши се однесуваат на национални програми за продажба на државјанства за земјите од ЕУ на инвеститори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вучиќ до Силјановска-Давкова: Уверен сум дека ќе продолжиме да работиме на зајакнување на врските меѓу Србија и Македонија
Српскиот претседател Александар Вучиќ ѝ ја честита победата на Гордана Силјановска-Давкова во вториот круг од претседателските избори во Северна Македонија.
„Ѝ честитам на Гордана Силјановска-Давкова за нејзиниот избор за претседател на Северна Македонија и ѝ посакувам успешно да ја извршува одговорната должност што ја презема. Уверен сум дека ќе продолжиме да работиме заедно за зајакнување на врските меѓу Србија и Македонија, со цел напредок и благосостојба на нашите народи, како и просперитет на целиот регион“, изјави Вучиќ на платформата „Икс“.
„Многу ми значат вашите честитки“, му одговори Силјановска-Давкова на Вучиќ по упатената честитка.
„Вашите искрени честитки ми значат многу, претседателе Вучиќ. Очекувам дека ќе продолжиме да работиме на подобрување на одличните македонско-српски односи. Ви благодарам многу, претседателе Вучиќ“!, напиша таа во својот одговор на социјалната мрежа X.
Регион
Нови детали за малата Данка: нејзината ДНК не била пронајдена на автомобилот со кој била удрена
Како што пренесува „Нова.рс“, на ниеден од предметите што биле земени за помош во истрагата не биле пронајдени биолошки траги од двегодишната Данка Илиќ од Србија.
Српскиот портал напиша дека досега се пронајдени повеќе од 400 траги во службеното возило за кое се сомневаат дека го користеле Дејан Драгојевиќ и Срѓан Јанковиќ кога, според нивното признание, го удриле девојчето. Обвинителството пред неколку дена ги доби резултатите од новите вештачења.
„Од внатрешноста на службениот автомобил во Бор се земени повеќе од 500 траги, како и траги од надворешната страна на автомобилот. Досега вештачењата покажаа дека нема трага од ДНК на Данка Илиќ ниту во самиот автомобил ниту на надворешните делови од возилото“, пишува „Нова.рс“ повикувајќи се на Вишото јавно обвинителство.
Медиумот потсетува дека осомничените работници на фирмата „Водовод“ од Бор, Јанковиќ и Драгијевиќ, биле на работна задача на 26 март кога во Бањско Поле исчезна двегодишно девојче. Според признанието на Драгијевиќ, девојчето го удриле со службеното возило, го задавиле и го фрлиле на дива депонија, од каде што два дена подоцна Дејан со својот татко (73) и сега починатиот брат Далибор (40) наводно го преселиле телото на друга, непозната локација.
Телото на двегодишната Данка сè уште не е пронајдено.
Регион
Се урна конструкција на рингишпил, повредени 13 деца, од кои едно е во животна опасност во Куршумлија
Во Куршумлија денеска се случила несреќа кога на локалниот саем се урнала конструкцијата на рингишпилот, пренесуваат српските медиуми.
Според написите, повредени се 13 деца, од кои едно потешко.
Станува збор за девојче, чиј живот е во опасност и има сериозни повреди на главата и ‘рбетниот столб.
Таа била итно префрлена во КЦ „Ниш“ на Одделот за неврохирургија.
Седум деца се во друга болница, каде што во тек е понатамошна дијагностика, а другите деца се полесно повредени, пишуваат тамошните медиуми.