Регион
Хрватска воведува огромни казни за прекршоци против јавниот ред и мир
Хрватската влада во четвртокот усвои предлог-измена на Законот за прекршоците против јавниот ред и мир, според кои драстично се зголемуваат износите на казните што досега се движеа меѓу 20 и 170 евра, пренесува хрватски „Дневник“.
Со предлогот се предвидуваат казни од 700 до 4.000 евра за најтешките прекршоци, меѓу кои и за истакнување симболи и поздрави чија содржина изразува или поттикнува омраза, како и за ширење лажни вести.
Во четвртокот, хрватската влада, исто така ја прифати Виенската декларација за подобрување на соработката во борбата против антисемитизмот и поттикнување на пријавувањето антисемитски инциденти.
„За одредени прекршоци глобите се зголемуваат за да се приспособат промените и да имаат ефект на одвраќање, но и да се изедначат со казните за слични прекршоци од другите закони“, истакна хрватскиот министер за внатрешни работи, Давор Божиновиќ.
Законот по итна постапка ќе биде доставен до хрватскиот Сабор.
Во групата најтешките прекршоци, за кои се предлагаат казни од 700 до 4.000 евра, се делата на нарушување на јавниот ред и мир со истакнување или носење симболи, изведување, репродуцирање песни, композиции и текстови, слики, цртежи, дрско и непристојно однесување во јавноста, со кое се навредуваат граѓаните и се нарушува нивниот мир, како и измислување и ширење лажни вести и, меѓу другото, неовластено пукање со огнено оружје.
Максималната казна со која Хрватска сака да ги дисциплинира граѓаните за да не прават прекршоци против јавниот ред и мир сега може да изнесува речиси четири просечни плати, а според досегашниот закон, максималните казни беа 16,7 % од просечната плата.
Граѓаните што имаат малолетни деца треба да бидат особено загрижени за своите финансии бидејќи ако нивното дете направи прекршок против јавниот ред и мир, а се докаже дека тоа е резултат на лошо воспитување или на негрижа, може да платат казна од 700 до 4.000 евра.
Интересно е и тоа што родителите ќе бидат построго казнети ако не го воспитале детето добро отколку ако го поттикнале да направи прекршок бидејќи се предлага родител или старател што ќе поттикне дете да направи прекршок да се казни со глоба меѓу 300 и 2.000 евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Мажот кој со сопругата загина во Хрватска, пред несреќата се снимал во живо додека вози „бмв“ 200 на час
Еди Здјелар (24) и неговата сопруга загинаа вчера во тешка сообраќајна несреќа кај Новска во Хрватска, а нивното двегодишно дете е тешко повредено.
Здјелар управувал „бмв“ со кое со голема брзина удрил во камион на автопат, а со нив во автомобилот имало и дете. До несреќата дошло кога тој удрил во задниот дел на камионот со босански национални ознаки што се движел пред него во истиот правец.
Кусо пред несреќата, 24-годишникот на својот Фејсбук профил објави видео на кое се гледа како вози на автопат, каде може да се забележи дека возел повеќе од 200 километри на час. На видеото во позадина гласно се слуша музика, а надвор врне.
Здјелар во еден дел од видеото ги поздравува пријателите и ги известува дека оди на крштевка. Видеото е снимено во периодот од 14:30 до 14:45 часот, што одговара на времето на несреќата кое е пријавено во 15:00 часот.
Порталот „24сата“ пишува дека во 2019 година Здјелар предизвикал уште една сообраќајна несреќа со смртни последици. Како возач на комбе изгубил контрола над возилото и неконтролирано преминал на другата страна на патот и удрил во бетонски мост. Тогаш загинале маж и неговата бремена сопруга.
„Јутарњи лист“ пишува дека девојчето моментално e надвор од животна опасност.
Регион
Драма во Хрватска: мал авион ја промаши пистата и удри во луѓе, има повредени
Во несреќата што се случи на Хвар, Хрватска, кога помал авион ја промаши пистата, три лица се полесно повредени, јави ХРТ.
Несреќата се случила во Староградско поле, кога авионот ја промашил пистата при слетување и удрил во двајца велосипедисти.
Повредените со хеликоптер се пренесени во сплитската клиничка болница.
Регион
Тепачка пред средно училиште во Сараево: повредено едно лице
Денеска во 11 часот и 40 минути пред Средното машинско-техничко училиште во Сараево дошло до физичка пресметка меѓу две лица во која едно лице е повредено, пренесува порталот „Radiosarajevo.ba“.
Според забележаното од порталот „Radiosarajevo.ba“ пред Средното машинско-техничко училиште, биле припадници на КС МУП и вршеле истрага.
„Пред училиштето се е оградено со жолти ленти, а полицијата е на терен“, пренесува порталот.
Според последните информации, непознат маж бил повреден од камен и во моментов се наоѓа во здравствена установа за да му биде укажана соодветна лекарска помош.