Родителите на две и полгодишно девојче, кое било донесено со тешки повреди на главата, се уапсени, пишува хрватскиот портал „Индекс“.

Во тек е кривична истрага, која треба да ги утврди сите околности на страдањето на детето, а по тоа, како што се наведува, ќе бидат поднесени кривични пријави против родителите.

Портпаролот на полицијата, Давор Брежиќ, за „Индекс“ изјави дека родителите во моментот се товарат за кривично дело кршење на правата на детето за што е предвидена казна од една до осум години затвор.

„Другите деца од тоа семејство се во згрижувачко семејство со одлука на Центарот за социјална заштита“, рече Брежиќ.

Во Хрватска одекна веста за бруталната повреда на две и полгодишното девојче, кое со тешки повреди на главата е пренесено од Нова Градишка во болницата „Клаиќ“ во Загреб.

Девојчето е оперирано, приклучено на респиратор и е витално загрозено.
Директорот на болницата „Клаиќ“, Горан Роиќ, за „Индекс“ изјави дека девојчето било во мозочна кома.

„Ќе следуваат дополнителни пребарувања, така што ќе видиме, но многу е критично“, рече Роиќ.

Според информациите од порталот, девојчето било одземено од родителите набргу по раѓањето и посвоено во згрижувачко семејство, но во ноември минатата година било вратено кај своите биолошки родители.

Детето во болницата во Нова Градишка го донела мајката, која на лекарите им рекла дека девојчето паднало и се повредило.

Семејството има уште три деца. Родителите се уапсени доцна синоќа.