Една од централните теми на разговор меѓу премиерите на Албанија и Грција во Софија бил и сè уште важечкиот закон на Грција за воена состојба со Албанија.
Грчкиот премиер Алексис Ципрас на средбата со неговиот албански колега, Еди Рама, во Софија признал дека де факто Албанија и Грција се во воена состојба поради постојниот закон за војна кој е донесен од грчка страна во 1940 година и повторно потврден во 1945 година.

„Ние сме сè уште во војна“, изјавил Ципрас, пренесуваат албанските медиуми.

Двајцата министри нагласиле дека надминувањето на овој проблем, кој сè уште ги бранува односите на Атина и Тирана, ќе биде решен во пакет со другите проблеми за кои веќе се преговара помеѓу двете влади заедно со морската граница.

Тиранскиот весник „Дита“ пишува дека веќе е пред крај договорот на Атина со Тирана овој закон да престане да важи, а како решение е договорено тоа да го стори грчкиот претседател.

Инаку, историјата на законот за војната почнува на 10 ноември 1940 година кога со декрет број 2636 на грчкиот крал е прогласен овој закон за воена состојба на Грција со Албанија и Италија. По окупацијата на Грција од Германија, квислиншката влада во Атина предводена од страна на премиерот Јоргос Золагоклус го симна законот за војна. Но, по завршувањето на Втората светска војна, повоената влада на Грција во 1945 година го стави законот за војна повторно во сила, со што повторно ѝ прогласи војна на Албанија со нов декрет број 13.