Регион
Четиригодишно дете заборавено во комбе на градинка во Атина: со часови чекало некој да го пронајде

Четиригодишно момче заборавено во комбе на градинка во Атина, седум часа мирно чекало некој да го пронајде.
Во понеделникот, како и секој работен ден, комбето донело пет деца во градинката, но возачот и придружничката не забележале дека излегле само четири, а на едно од седиштата дремело мало момче, кое останало заборавено во комбето.
Возачот го одвезол комбето од паркингот и си заминал, јавува денеска атинска „РТВ скај“.
Четиригодишното момче потоа се разбудило и некако излегло од комбето, но видело дека е на непознато место и се вратило на внатре во комбето. Го врзало појасот како што претходно научило и чекало некој да го пронајде да да стигне до градинката, а вели дека некое време и спиело.
Било пронајдено седум часа подоцна кога возачот дошол да ги однесе децата дома од дневниот престој во попладневните часови. Дури тогаш родителите на момчето дознале што се случило со нивниот син.
Случајот со заборавеното момче денеска го соопшти Јоргос Хутумадис, претседателот на Здружението на родителите на Втората детска градинка во општина Кифисија, но не кажа што е преземено за да не се повтори случајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Во повеќе градови во Бугарија големи протести против злоставувачите на животни: „Сакаме затвор, а не парични казни“

Во повеќе градови во Бугарија и денес се одржа сенароден протест за одбрана на животните.
Во Софија незадоволните граѓани кренаа плакати: „Доживотен затвор за изродите“, Стоп за злоупотреба на животни, Затвор за убијци на животни“.
Демонстрантите повторно побараа затвор за злоставувачите на животни, а не парични казни. Тие носеа и натписи: „Нема оправдување за оваа тортура“.
Во Бургас се одржа втор протест против насилството во сите негови форми. Пред зградата на судот, стотици граѓани, заедно со нивните миленици, се собраа да побараат правда, пренесе „БГНЕС“.
„Ова мора да престане! 360 случаи, 9 обвинети, смешни казни! Потребна ни е контрола, регистар на продадени животни, вистинска превенција и буџет за обука на специјализирани служби. Но што е најважно – треба да знаеме кој ги одложува овие промени ма цивилизирано општество!“, изјави организаторот на протестот Николај Ќучуков.
Во Благоевград десетици луѓе со своите миленици се собраа пред Судската палата со барања да не се игнорираат инцидентите на злоупотреба на животни и сторителите да добијат правична казна.
Во Варна, демонстрантите се собраа пред зградата на општината, а потоа мирно маршираа до Плоштадот на независноста во градот. Луѓето скандираа и држеа плакати со натписи: „Не за агресијата кон бездомните животни“ и „Тие умираат без своја вина“.
Демонстрантите се надеваат дека реакцијата на јавноста ќе донесе правични казни за насилниците, законски измени во корист на животните и нетолеранција кон агресија и насилство во која било форма.
„БГНЕС“ потсетува дека 26-годишната Габриела Сашова и 35-годишниот Красимир Георгиев се обвинети дека за пари снимиле страшни видеа на злоставување животни. Окружниот суд Перник ги стави двајцата обвинети во притвор.
Сашова и Георгиев ги снимале бруталните видеа во име на „клиенти“ од целиот свет и примале плаќање во криптовалути и преку разни онлајн платформи.
Регион
Драма на небото над Хрватска: авион полета за Фанкфурт, па се врати назад за 20 минути

Авион на „Кроација ерлајнс“ кој утринава полета од Загреб за Франкфурт се врати на аеродромот „Фрањо Туѓман“ по само 20 минути лет, јавуваат патниците.
Авионот морал да се врати поради технички проблеми.
„Мала техничка неисправност. Сега седиме во авион во Загреб“, вели патникот, пренесе „Вечерњи“.
Како што се додава станува збор за авион „Даш 8“, кој е дел од националниот превозник од 2008 година, што значи дека лета веќе 17 години.
За таков модел, тоа е приближно две третини од работниот век, што во Европа е во просек 25 години.
Авионот е еден од петте вакви турбопромотори што ги има Хрватска во својата флота, 9A-CQA е најстар. Во последните седум дена имаше во просек по седум лета дневно.
Регион
Додик: Вучиќ уште еднаш потврди дека тој е изворот на стабилноста и силата на Западен Балкан

Претседателот на Република Српска, Милорад Додик, им се заблагодари на Србија и нејзиниот претседател за денешната поддршка и рече дека кога политиката ја засновате на принципи, вистина, право и правда, кога сакате добро за својот народ и не сакате ништо лошо за другите – тогаш сте лидер, како Александар Вучиќ.
Вучиќ потврдува дека е човек кој е извор на стабилност и сила на Западен Балкан, човек кој реално ги гледа работите и ја отвора вратата за компромиси, разбирајќи ги легитимните интереси на сите – не наметнувајќи ништо никому“, напиша Додик на платформата Икс.
Тој посочи дека Србија, изградена со несебичните напори на Вучиќ, е столб на мирот и стабилноста.
„Таква Србија е исто така симбол на економскиот напредок и развој. Моќна и силна под негово водство, таа е и силна поддршка за Република Српска“, рече Додик.
Претседателот на Република Српска истакна дека таква Србија им пречи на оние кои би сакале да го видат српскиот народ на колена, но таква слика нема да видат.
„Србија на чело со Вучиќ оди со крената глава, горда и свесна за својата историја и својата иднина. Затоа блокадите треба да престанат и Србија да се собере и да го избере Александар Вучиќ“, вели Додик и посочува:
„Ние сме им благодарни на претседателот Александар Вучиќ и на Србија за нивната поддршка, што и овојпат се одразува во јасна и принципиелна комуникација со Интерпол, во однос на обидот од Сараево да ги ограничи меѓународните контакти на врвот на Република Српска.
Тој изјави дека притисоците и злоупотребите на меѓународните институции не смеат да бидат средство за политичка борба во Босна и Херцеговина.
„Александар Вучиќ останува рационален глас на стабилноста, дијалогот и мирот во регионот. Неговата формула – дијалог, договор и почитување за сите без наметнување – е единствениот можен пат до решение и излез од кризата“, јасен е Додик.
Претпоставувам, вели претседателот на Република Српска, досега им станало јасно, а ако не – доволно ќе биде, дека никого нема да исплашат и ништо да постигнат со притисоци и уцени.
„Само околностите ќе го направат дијалогот уште покомплексен и отежнат. Затоа избираме одговорност и разум, а не уцени и авантуризам“, изјави Додик, пренесува Танјуг.