Српскиот премиер Александар Вучиќ ги смени во петокот сите шефови на петте управи на полицијата на тамошното министерство за внатрешни работи незадоволен од борбата против криминалот.
 

По попладневната седница на Советот за национална безбедност на Србија, премиерот Александар Вучиќ изјави дека би бил сменет и актуелниот директор на српската полиција, Милорад Вељовиќ, но оти за тоа немало правни предуслови. „Денеска и Вељовиќ ќе беше сменет да не беше избран на конкурс, не затоа што е виновен, туку од морални причини“, изјави Вучиќ на прес-конференција по седницата појаснувајќи дека барал резултати во борбата против нарко-картелите „но луѓето во министерството за внатрешни работи повеќе ги интересираа некои внатрешни работи“, пренесува Танјуг.

Вучиќ појаснил дека одлуката за смените на високите полициски функционери следела согласно иницијативата на министерот за внатрешни работи и со согласност на директорот на полицијата, а до именувањето на новите личности на овие позиции, нивната должност ќе ја извршуваат замениците на досегашните началници.

Српскиот премиер истакнал дека „на владата нема да и’ наредува (обвинетиот како нарко бос кому му се суди за шверцување на кокаин) Дарко Шариќ, како ниту (еден од осудените како водач на криминална група) Љубиша Буха Чуме“. „За жал, многумина влегоа во борбата меѓу Чуме и Шариќ, но Србија во тоа нема да учествува“, истакнал Вуќиќ, отфрлајќи ги како измислици наводите според коишто за ткн „Земунски клан“ и врските на Шариќ со врвот на српската полиција во таблоидите ги пласирал Љубиша Буха Чуме.

Вучиќ порачал дека „Србија ќе биде нормална, пристојна и уредена земја во којашто полицијата ќе се грижи за граѓаните, а не за политиката“, како и дека „нема да има воздух во Србија“ за оние коишто „ги извалкале рацете со криминал, кои се до гушата во корупциските афери“. „Убеден сум дека ќе успееме да работиме уште подобро и повеќе, луѓето да се чувствуваат сигурно и дека во 2018 година ќе ја извршиме работата и ќе можеме да кажеме дека сме подготвени за Европската унија“, истакнал српскиот премиер.

На прес-конференцијата на премиерот Александар Вучиќ и’ претходеше обраќањето до нацијата на српскиот претседател Томислав Николиќ кој во програмата на јавниот сервис Радиотелевизија Србија (РТС) побара смени и реформи на полицијата, истакнувајќи дека со борбата против криминалот не е задоволен ниту самиот тој како шеф на државата, ниту владата ниту граѓаните на Србија.

Истовремено, и владејачката Српска напредна партија (СНС), најави дека и врвот на партијата, од којашто потекнуваат и премиерот Вучиќ и претседателот Николиќ, „ќе дискутира за актуелната политичка ситуација во земјата“.

Белградските електронски медиуми во петокот коментираа дека големите смени во српската полиција следат по повеќедневната кампања во медиумите и јавните шпекулации за смените на високите полициски функционери.

Медиумите во Србија со ситуацијата во самиот врв на полицијата се занимаваат по неодамнешните обвинувања дека Дарко Шариќ, кој се смета за шеф на моќен нарко клан, дека пријател на еден полициски генерал го „создал Земунскиот клан“, како и на забелешките на црногорскиот премиер Мило Ѓукановиќ дека „постои нервоза на безбедносно-медиумските структури во Србија“, коишто наводно, „потсетуваат на атмосферата од 2003 година“, кога во атентат беше убиен српскиот премиер Зоран Ѓинѓиќ, за што се обвинети лица од српското подземје припадници на ткн Земунски клан./крај/мф/сн

Извор: Макфакс