Имамот Селведин Бегановиќ, кој отворено го критикува заминувањето на Бошњаците во редовите на радикалната сунитска организација Исламска држава (IS), повторно бил нападнат во саботата.

Како што пишува во неделата сараевскиот дневен весник Dnevni Avaz, имамот Бегановиќ се здобил со убодна рана нанесена со нож во пределот на рамото, по што непознатиот напаѓач побегнал. Инцидентот се одиграл околу пладне во саботата недалеку од џамијата кога имамот се подготвувал за верски обред.

Станува збор за четврти напад врз Бегановиќ во последните три месеца. На почетокот од декември непознато маскирано лица го нападна со нож и му нанесе тешки телесни повреди во рамото и на рацете. Само пет дена подоцна, на 13-ти декември, исто така маскирано лице го нападна на влезот од џамијата, при што имамот се здоби со голем број удари по телото и лицето На почетокот од јануари Селведин Бегановиќ беше нападнат недалеку од неговата куќа во близина на Велика Кладуша. Непознатиот напаѓач тогаш му пришол на имамот пред неговата куќа во местото Трнови, прво го удрил со тап предмет по главата, а потоа го нападнал со нож и му нанел две рани на две места по телото, во пределот на градите и на вратот.

Полицијата досега не успеа да идентификува ниеден од напаѓачите, а самиот имам ги опишува како следбеници на радикалните исламисти – селефистите.

Имамот Селведин Бегановиќ во своите јавни настапи остро се спротиставува на врбувањето на бошњачката младина за војната во Сирија, особено на страната на џихадистичките Исламска држава и Џебхат (Фронтот) ан-Нусра, која е сириски огранок на глобалната терористичка мрежа Ал Каеда.

Државното обвинителство на Босна и Херцеговина го обвини неформалниот лидер на радикалното селефиско движење во земјата, Билал Босниќ од општината Цазин, недалеку од Велика Кладуша, за тероризам, за поттикнување на заминување во војната во Сирија, за врбување и за финансирање терористички активности.

Меѓутоа, со апсењето и процесуирањето на Босниќ не е запрено заминувањето на Бошњаците на боиштата во Сирија и во Ирак. Минатата седмица во БиХ беа уапсени шест лица кои се подготвувале да заминат на боиште и да и’ се приклучат на Исламската држава, што од минатата година е кривично дело во БиХ./крај/мф/сн

Извор: Макфакс