Бугарија е подготвена, наместо проектот „Јужен тек“, на својата територија да изгради центар за дистрибуција на гас на европско ниво, изјавил бугарскиот премиер Бојко Борисов, пренесува руската агенција Тас.

„Можеме да изградиме центар за складирање на гас во Варна, каде од Црното море требаше да излезат цевките планирани за изградбата на гасоводот „Јужен тек““, изјавил Борисов.

Тој додал дека Европската комисија, според планот на нејзиниот претседател Жан-Клод Јункер, би можела да финансира изградба на постројки за складирање на течен гас, кои би биле пополнувани во Бугарија, а потоа гасот би бил испорачан до останатиот дел на Европа.

„Европската унија ќе донира средства за ова складиште. Правиме дистрибуциски центар на ЕУ во Варна, а ние сме број еден во однос на диверсификацијата“, рекол Борисов, додавајќи дека ваквиот центар е во интерес на Бугарија, но и на целата ЕУ, поради тоа што Бугарија на ЕУ и на цела Европа може да и понуди „совршена можност за позиционирање на гасно складиште во Бугарија, а не во Турција“.

Бугарскиот премиер им наложил на своите министри за оваа иницијатива да ги известат сите заинтересирани страни.

Рускиот претседател Владимир Путин на 1-ви декември, по разговорите со својот турски колега Реџеп Тајип Ердоган, изјави дека Русија го прекинува проектот за изградба на гасоводот „Јужен тек“ и дека е подготвена да изгради гасен центар на турско-грчката граница за снабдување на југоисточна Европа со гас./крај/мф/бс