Снежните бури и силни ветрови ја парализираат Романија, како и северните и централните региони на Бугарија, соопштија во неделата властите на двете земји.

Во бугарската престолнина Софија паднале 40 до 50 сантиметри снег, а слично е и во Ловеч и Велико Трново во централна Бугарија. Железничкиот сообраќај многу е отежнат на северот и во централниот дел од земјата, а патниците од источниот црноморски пристанишен град Варна за Софија морале повеќе од два часа да чекаат да се исчистат пругите и да се оспособат за сообраќај.

Снежните врнежи ги следи силниот ветер, а температурите во следните денови се очекува да паднат на минус 17 Целзиусови степени.

Планинскиот венец Родопи, во јужна Бугарија, погоден е од силни дождови кои предизвикаа поплави и одрони, па во областа на Смолјан е прогласена вонредна состојба. Премините на преку планинскиот синџир Стара Планина и Балкан се затворени поради снегот чијашто височина во моментов е еден метар.

За само 12 часа во Романија наврнало половина метар снег, поради што е отежнат или прекинат железничкиот сообраќај, а во главниот град Букурешт и во блиските општини училиштата ќе останат затворени. Десетици села на југот од Романија останале без електрична енергија.

Затворени се и пристаништата на Црното Море, вклучително и главното пристаниште Констанца, а повеќе десетици патни правци се затворени за сообраќај. Засега нема информации за жртви од временските прилики, но романските власти ги мобилизираа сите служби за вонредни состојби, вклучително и 6.000 полицајци, жандари и пожарникари кои се упатени на расни интервенции ширум земјата.

Според прогнозите, снегот нема да престане да падне пред понеделникот, а температурите може да паднат до минус 18 Целзиусови степени./крај/мф/сн

Извор: Макфакс