Регион
Бугарскиот парламент ја прифати оставката на премиерот Борисов

Бугарското Национално собрание ја прифати во средата оставката на малцинската влада на партијата од десниот центар Граѓани за европска Бугарија (ГЕРБ) на премиерот Бојко Борисов, отворајќи простор за политичка несигурност и веројатно предвремени парламентарни избори на почетокот од следната 2017 година.
Сите партии застапени во бугарскиот парламент во средата ја поддржа оставката на владата.
Претходно премиерот Бојко Борисов судбината на својата влада ја поврза со исходот од бугарските претседателски избори и го оствари своето ветување откако викендов на вториот круг надмоќно победи политичкиот новак генералот Румен Радев, кој беше поддржуван од опозициската Бугарска социјалистичка партија (БСП), а важи како личност којашто се залага за подобрување на односите со Русија.
„Резултатите од претседателските избори од неделата покажуваат дека општеството сака промени. Изборите бараат промена на политичката ситуација“, рече Борисов во парламентот.
Според политичките коментатори, Бугарија сега се соочува со неколкумесечна политичка несигурност со влада којашто во меѓувреме нема да презема големи политички реформи.
Неуспехот на кандидатката на ГЕРБ, Цецка Цачева, инаку претседателка на парламентот, го истакнува неуспехот на политичарите и на Борисов да ги убедат гласачите во врска со борбата против корупцијата, откако неговата партија на предвремените избори во 2014 година ги победи социјалистите.
Истовремено, многумина во Бугарија покажуваат големо незадоволство од политичките елити, како и од односот на Европската унија, соочувајќи се со имиргантската криза, безвизниот режим, скапата енергија, нискиот животен стандард…/крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Тројца загинати и седум лица во тешка состојба по превртување на автобус кај Сремска Митровица

Состојбата на повредените во тешката сообраќајна несреќа што се случи кај Сремска Митровица, во која животот го загубија три лица, и понатаму е сериозна, изјави денеска директорот на Општата болница во Сремска Митровица, д-р Војислав Мирниќ.
„Хоспитализирани се 39 пациенти. Од нив, седум се со потешки повреди и се наоѓаат на одделенијата за интензивна нега, додека 15 пациенти се подготвени за отпуст,“ рече Мирниќ.
Тој прецизираше дека 13 пациенти од Одделението за општа хирургија и двајца од Одделението за ортопедија се во стабилна состојба и наскоро ќе бидат пуштени дома.
„Се врши дополнителна дијагностика за сите пациенти, а во наредните 48 часа очекуваме уште дел од нив да бидат подготвени за отпуст. Посетите во болницата се дозволени од 14 до 16 часот,“ додаде Мирниќ.
Во несреќата, која се случила на патот меѓу Сремска Митровица и селото Јарак, загинале три лица – две на самото место и едно во болница, од последици на тешките повреди.
Вкупно 61 патник бил прегледан во митровачката болница, а 39 лица биле задржани на лекување. Осуммина се на интензивна нега, дваесетмина на општа хирургија, а единаесетмина на ортопедија.
Еден пациент е префрлен во Ургентниот центар во Нови Сад, а друг во Белград на понатамошно лекување.
Автобусот на превозникот „Сирмиум бус“, кој превезувал работници, под засега непознати околности излетал од патот и се превртел. Возачот на автобусот, Д. К. (1955), е уапсен поради сомнение дека ја предизвикал несреќата во која загинаа три лица. Нему му е одредено задржување до 48 часа, по што ќе биде изведен пред надлежното обвинителство со кривична пријава.
Регион
Трета жртва од тешката сообраќајка во Сремска Митровица – почина за време на операцијата

Уште едно лице загинало по сообраќајната несреќа што се случи денес во Сремска Митровица, кога автобус се преврте и излета од патот. Ова е третата жртва на ужасната сообраќајна несреќа.
Како што објави „Н1“, лицето загинало за време на операцијата.
Како што претходно беше објавено, возачот на автобусот е приведен и во притвор до 48 часа.
Повредени се околу 80 лица. Причините за несреќата засега не се познати.
Регион
Вучиќ: Србија ќе се приклучи на развојот на руската вакцина против рак

Претседателот на Србија, Александар Вучиќ, изјави дека разговарал со Александар Кецман, директор на Институтот „Гамалеја“ во Москва, кој го информирал дека во Русија се развива вакцина против рак.
„Ми објаснија одредени работи. Имаме голем процент на заболени од рак. Оваа вакцина е поинаква, бидејќи им помага на веќе болните луѓе — не е превентивна. Може да биде успешна до 85 проценти,“ рече Вучиќ.
Тој додаде дека Србија ќе се вклучи во проектот веднаш штом Русија го дозволи тоа:
„Ќе подготвиме целосна инфраструктура за да бидеме спремни за два до три месеци. Не можеме уште да ја произведуваме, но ќе направиме сè за да бидеме подготвени.“
Вучиќ нагласи дека во Србија има повеќе случаи на малигни заболувања отколку во другите земји, што, според него, е поврзано со последиците од бомбардирањето во 1999 година.