Регион
Ципрас тврди дека јули е рокот за договор со заемодавците

Челникот на коалицијата на грчката радикална левица Сириза, 40-годишниот Алексис Ципрас, во петокот ги отфрли тврдењата дека Грција мора до крајот на следниот месец да ја доврши ревизијата на условите за меѓународната финансиска помош, истакнувајќи дека владата којашто би ја предводела левицата со Европската унија и Меѓународниот монетарен фонд ќе преговара до јули.
Грчката влада предводена од конзервативната Нова демократија и премиерот Антонис Самарс настојуваше да ја заврши ревизијата на програмата за странска финансиска помош во износ од 240 милијарди евра, но целиот процес беше прекинат поради предвремените парламентарни избори кои ќе се случат во недела 25-ти јануари, откако во декември парламентот во трите законски предвидени круга не испеа да избере претседател на државата.
Договорот за помошта од ЕУ и ММФ истекнува на 28-ми февруари, па функционери од еврозоната оставија можност да се насети дека Грција веројатно ќе мора да побара уште едно продолжување на траењето на програмата.
Меѓутоа, имајќи ја предвид веројатната изборна победа на Сириза, која се противи на жестоките мерки на штедење, Ципрас изјави дека планот на Европската централна банка (ECB) да ја поттикне економијата во еврозоната со 18-месечен откуп на државните обврзници, од март до септември идната година, во вкупен износ од над 1.000 милијарди евра, всушност го одреди рокот до кој Грција мора да ги доврши преговорите со заемодавците. Грција нема да може да учествува во програмата на ЕСВ до јули.
„Вчерашното објавување на ЕСБ го одредува графиконот за преговорите, а тој завршува во јули, што е рок кој и ние го одредивме, а не 28-ми февруари“, истакна Ципрас, изразувајќи убедување делка дотогаш ќе постигне „одржливо взаемно прифатливо решение“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Силна бура го парализираше црногорското приморје, најкритично во Котор

Силна бура го погоди црногорскиот приморски појас утрово, оставајќи го Котор и околните градови под тежок пороен дожд. Которскиот Залив е целосно погоден од силниот дожд и ветрови, а морето е разбрането, со големи бранови кои се спојуваат со сивото небо.
Туристите, кои вчера уживале во пливање, денес се соочуваат со потполно нестабилни услови.
„Колку и да уживавме во пливањето вчера, денес можеме да пливаме на улица“, изјавил еден од нив.
Ситуацијата е особено критична во близина на Вирпазар, каде што сообраќајот е прекинат поради несреќа, објави РТЦГ. Локалните власти апелираат на внимание и ги советуваат граѓаните да ги следат предупредувањата за безбедност.
Регион
(Видео) Драма на скопскиот аеродром: Aвион од Крит со 200 лица слета во Скопје наместо во Белград

Патници на авиокомпанијата „Виз ер“ кои требаше да летаат од Крит за Белград, наместо тоа завршија на аеродромот во Скопје околу 4 часот утрото, пренесува N1.rs.
Летот, кој бил закажан 15 минути по полноќ, првично бил пријавен како празен, што ги изненадило и полицијата и вработените на скопскиот аеродром.
Јелена, една од патничките, изјавила дека околу 200 лица излегле од авионот, без претходна информација за пренасочувањето. Патниците најпрво добивале СМС-пораки за одложување, а потоа, во 4:20 часот, полетале кон Скопје. На аеродромот биле задржани во авионот подолго време, а не им било дозволено да излезат сè додека една жена не почувствувала влошување на здравјето. На крајот, патниците останале на празен аеродром додека не им бил обезбеден автобус за Белград.
Пилотот им појаснил дека неговото работно време е завршено и дека повеќе информации ќе добијат на аеродромот, но и таму вработените биле целосно збунети бидејќи им било пријавено дека авионот е празен. Патниците се обратиле и до Амбасадата на Србија, но добиле одговор дека не може ништо да се стори, со образложение дека „аеродромот во Белград не работи и не прима авиони“.
Според официјалните информации, веб-страницата на белградскиот аеродром го прикажува летот како откажан, додека на македонскиот аеродром е евидентиран како реализиран, но со задоцнување од повеќе од три часа. На веб-сервисот FlightRadar се забележува дека авионот наместо во Белград, слетал во Скопје, без објаснување за причините.
Регион
Српската туристка која исчезна додека пливала кај Солун е пронајдена мртва

Жена (76) од Србија, која се водеше како исчезната од синоќа во близина на Солун, е пронајдена мртва утрово кратко по 8 часот, во морскиот регион, јавува „Прототема“, пренесува „Танјуг“.
Грчката крајбрежна стража вчеравечер ја започна потрага по исчезната пливачка во близина на градот Агиа Триада, во близина на Солун.
Порталот „Прототема“ објавија дека жената отишла на пливање со двајца пријатели, а крајбрежната стража била известена за нејзиното исчезнување околу 21:30 часот по локално време.
Во спасувачката операција учествувале два брода на крајбрежната стража, брод во близина и рибарски чамец. На барање на крајбрежната стража беше мобилизиран и грчки спасувачки тим, кој пристигнал за да помогне, заедно со екипаж од четири члена волонтери и спасувачкиот брод „Один“.
Спасувачките екипи продолжуваат со пребарување на околуниот дел од морскиот брег и отвореното море во надеж дека ќе ја најдат исчезнатата туристка жива и здрава.