Црногорската полиција протерала четворица вехабии – двајца биле вратени во Србија, а двајца во Босна и Херцеговина (БиХ), соопштило црногорското министерство за внатрешни работи, јавуваат подгоричките медиуми.

Според соопштението од црногорското МВР, се работи за превентивни мерки преземени за спречување на терористички напади и регрутирање на црногорски државјани за странски војувалишта.

Подгоричкиот весник Дан пишува дека во неделата попладнето во местото Смоковац, при при контрола на возило со новосадски регистарски таблички биле откриени двајца вехабии од Нови Пазар, а по претресот тие биле приведени во подгоричкиот Центар за безбедност, каде било утврдено дека немаат лични документи, како нити пријавен престој.

Откако биле задржани во времетраење од 48 часа, двајцата биле протерани бидејќи полицијата веќе немала основа за нивно задржување. Истото се случило со двајца вехабии од БиХ, а тие како што се наведува исто така немале пријавен престој, а по проверка во полицијата им биле наредено да ја напуштат Црна Гора.

Според податоците на тајната полиција во Црна Гора се наоѓаат најмалку 100 до 120 вехабии, а од Агенцијата за национална безбедност соопштиле дека имаат податоци оти вехабиите добиваат значајни финансиски средства преку исламски хуманитарни организации, а како главен центар на вехабиите во Црна Гора се смета местото Плав.

Податоците на тајните служби покажуваат дека вехабиите во Црна Гора се поделени на повеќе групации, а најпознати се „Текфир група“ и „Нусретовци“, следбениците на Нусрет Имамовиќ, водачот на вехабиите во БиХ, познат по изјавите дека самоубиствените напади не се забранети, но дека треба да се користат во исклучителни прилики./крај/мф/бс