Неколку илјади демонстранти во грчката престолнина Атина во понеделникот го одржаа традиционалниот марш до амбасадата на САД на годишнината од бунтот на студентите на Политехничкиот универзитет, а на крајот го запалија американското знаме наспроти дипломатската мисија.

Според организаторите на маршот, поворката била долга повеќе од два километра и во неа учествувале 30 илјади луѓе, додека според полицијата бројот на учесниците на маршот биле неколкупати помал, околу 8.500 луѓе, според неименуван висок полициски офицер кој командувал со полициски кордон спроти амбасадата на САД. Според него, по целата маршрута на поворката и центарот на Атина биле распоредени седум илјади полицајци. Сите приоди кон американската амбасада биле блокирани со полициски автобуси, пренесуваат грчките медиуми.Освен палењето на знамето, манифестацијата минала без поголеми инциденти, и имало само два помали судира со групи анархисти. Анархистите фрлале камења, додека полицијата одговорила со неколку шок гранати и солзавец „во ограничени количества“, а според репортерите неговиот мирис се чувствувал на неколку стотици метри во близина на американската амбасада. Во близина на централната атинска метро станица „Амбелокипи“ анархистите запалиле два контејнера за отпадоци. Сепак, според атинската полиција немало повредени.Денот на сеќавањето на бунтот на Политехничкиот факултет во Грција се одбележува секој 17-ти ноември. На тој датум 1973 година студентите ја заземаа зградата на универзитетот како протест против мешањето на власта во дејноста на студентските сојузи. Ноќта од 16-ти кон 17-ти ноември тенковите ги разбија капиите на универзитетот а во нападот беа убиени 23 луѓе и повеќе од илјада беа ранети, иако според официјалната грчка историографија воопшто немало жртви. Стотици студенти следните денови биле уапсени. Иако студентскиот бунт беше задушен, тоа доведе до масовни граѓански протести, што на крајот резултираше со пад на диктатурата на воената хунта.Манифестацијата по повод 41-годишнината од бунтот се одржуваше три дена, во кои Политехничкиот универзитет беше отворен за сите кои сакаа да им одадат почит на загинатите студенти. Притоа медиумите одбележуваат дека грчките антифашистички организации во кампусот ја поставија изложбата посветена на актуелната трагедија во источна Украина.Традиционално на демонстрациите присуствуваа претставници на левичарските партии и движења, на студентските организации и анти-глобалистите, а заедничкото мото е како и пред четири децении – „Леб – Образование – Слобода – Национална Независност“.Поворката, исто така, според традицијата тргнува од Политехничкиот универзитет до амбасадата на САД, како протест на тоа што Вашингтон ја поддржуваше хунтата во периодот од 1967 до 1974 година. Поради тоа, амбасадата и конзуларните претставништва на САД во Грција вообичаено на 17-ти не работат./крај/мф/сн

Извор: Макфакс