Европската комисија (ЕК) не даде коментар на одлуката на властите во Косово да го суспендира договорот за формирањето на Заедницата на српски општини (ЗСО), но порача дека и Приштина и Белград се одговорни околу спроведувањето на делот од Бриселскиот договор, кој се однесува на ЗСО, пренесуваат српските медиуми.

Запрашана да го објасни ставот на Европската комисија по повод одлуката на Уставниот суд во Приштина да го суспеднира делот од Бриселскиот договор за ЗСО, портпаролката Маја Коцијанчич изјавила дека Брисел „не коментира тековни правосудни постапки и очекува договорот од 25-ти август да биде спроведен, а за ова се одговорни и двете страни“.

Во годинешниот извештај за напредокот на западен Балкан во европските интеграции се потенцира дека во дијалогот меѓу Белград и Приштина, „клучните договори биле завршени на 25-ти август годинава“. Исто така, во извештајот се потенцира дека со ова „биле договорени главните елементи за изработка и усвојување на Статутот на Заедницата на општините со српско мнозинство на Косово“.

Во извештајот на ЕК се наведува дека „тој текст ја утврдува законската рамка на Заедницата, нејзините цели, организациска структура, односите со централните власти, законските овластувања, буџетот и финансиската потпора и ги утврдува модалитетите за нејзиното воспоставување“./крај/мф/бс