Маскирани напаѓачи, во сабота искршиле прозорци и фрлиле молотов коктел во кабинетот на косовскиот претседател, но не успеале да ја запалат зградата. 

Се уште никој не ја презел одговорноста за нападот во центарот на Приштина, кој владата го осуди како „опасен за уставниот поредок и стабилноста на земјата“.

„Сомнителните лица по фрлањето на молотовиот коктел заминале во правец на улицата „Агим Рамадани“, во возило со бела боја. Се сомневаме дека прво со камења ги искршиле прозорците и потоа го фрлиле молотовиот коктел, кој удрил во ѕидот на зградата и не влегол во неа“, се вели во соопштението од косовската полиција. Во моментот на нападот во претседателскиот кабинет немало никој, па затоа и нема повредени. Дел од надворешниот ѕид на зградата, кој се наоѓа на фреквентна улица во Приштина, е исцрнет од чадот.

Полицијата трага по автомобил за кој претпоставува дека бил користен од напаѓачите.

Кабинетот во моментов го користи претседателката во заминување Атифете Јахјага, а следниот месец треба да биде преземен од новоизбраниот претседател Хашим Тачи.

Косово со месеци се соочува со политичка криза, зашто опозицијата ја напаѓа власта поради договорот со Белград, постигнат со посредство на ЕУ, со кој им се даваат поголеми права на косовските Срби./крај/мф

Извор: Макфакс