Грција објави во понеделникот дека нејзината инфраструктура не е доволна да одговори на брановите бегалци кои пристигнуваат во земјата во една од најголемите хуманитарни кризи со коишто се соочува Европа по Втората светска војна.

Додека со години наназад се бори со катастрофалната економска криза, Грција е вовлечена во нова криза по масовното пристигнување на бегалците, во прв ред Сиријци, кои бегаат пред тамошната граѓанска војна.

Некои меѓународни хуманитарни агенции не се задоволни со реакцијата на Атина на напливот на имигрантите од Африка и бегалците од Блискиот исток. Високиот комесаријат на ОН за бегалци (УНХЦР) минатата седмица соопшти дека Грција треба да покае повеќе водство и да ја преземе контролата над ситуацијата.

Бројот на имигрантите во Грција годинава надминал 160 илјади, што е трипати повеќе отколку минатата година, соопштија во понеделникот грчките власти предупредувајќи дека повеќе не можат да се справуваат со таквата ситуација.

„Ова е земја примател и како таква е задолжена да има инфраструктура. Меѓутоа, нé обвинуваат за работи коишто немавме време да ги сториме, она што сите претходни влади не го сториле претходните години“, изјави за телевизијата Alpha TV Олга Геровасили, портпаролката на досега владејачката левичарска коалиција Сириза.

„Тоа не е само грчака трагедија, тоа е европска криза. Се случува пред очите на кусогледите европски челници чијшто поголем приоритет е да ги заштитат границите отколку помошта за преживеаните во судирите“, критикува Гаури ван Гулик, заменик на директорот на Amnesty International за Европа и централна Азија./крај/мф/сн

Извор: Reuters