Еврокомесарот за проширување Јоханес Хан оцени дека Црна Гора напредувала во исполнувањето на почетните мерила во повеќе поглавја, како и дека по усвоените закони и формирањето институции за борба против организираниот криминал и корупцијата, мора да се насочи на резултатите, односно истрагите, судскиот прогон и правосилните пресуди.

Во разговорот од неделата за црногорската агенција МИНА, еврокомесарот за соседска политика и проширување Јоханес Хан, вели дека е прерано за предвидувањата за тоа колку точно поглавја ќе бидат отворени оваа година.

„Одлуката за тоа ја носат државите членки на Европскиот совет, но не смее да се заборави дека секој напредок во отворањето на поглавјата зависи од напредокот на функционирањето на правната држава. ЕУ со државите кандидатки преговара на основа на заслугите, што значи дека брзината на преговорите го одредува напредокот на секоја поединечна земја во исполнувањето на критериумите“, вели Хан.

Еврокомесарот не сакал да ги коментира последните апсења во Црна Гора, меѓу кои и на Светозар Маровиќ, висок функционер од Демократската партија на социјалистите (ДПС) и близок соработник на премиерот Мило Ѓукановиќ, велејќи дека не може да се изјаснува за поединечни случаи.

„Меѓутоа, јасно е дека сега кога во Црна Гора се подготвени соодветните закони и институции за борба против организираниот криминал и корупцијата, фокусот мора да биде ставен на јакнење на резултатите, односно на истрагите прогоните и правосилните пресуди“, вели Хан//ркај/мф/сн

Извор: Макфакс