Уставниот суд на Хрватска во средата одлучил дека во земјата нема да се одржи референдумот за употреба на кирилицата, поради тоа што референдумското прашање не е во согласност со хрватскиот Устав, пренесуваат тамошните медиуми.

Распишувањето на рефендумот беше поднесено од граѓанската инцијатива „Стожер за одбраната на хрватски Вуковар“, а хрватскиот Сабор потоа побара оценка на уставноста на референдумското прашање.

Граѓанската иницијатива „Стожер за одбраната на хрватски Вуковар“, составена воглавно од здруженија на хрватските бранители, кон крајот на минатата година до Саборот предаде околу 600 илјади потписи за распишување на референдум по измените на Законот на правата на националите малцинства, според кои малцинствата би имале право на официјална употреба на јазикот и писмото доколку сочинуваат половина од населението во одредена област.

Ова право сега им е овозможено на припадниците на малцинствата кои чинат повеќе од третина од населението, каков што е случајот со Србите во Вуковар, а токму поставувањето на двојазичните табли во септември минатата година во овој град беа причина за собирањето на потписите за референдумот.

Од хрватската влада, предводена од премиерот Зоран Милановиќ, повеќепати беше порачано дека е неприфатливо намалување на малцинските права и дека референдумот за употребата на кирилицата нема да се одржи, без оглед на тоа колку потписи ќе бидат собрани.

Во средата, исто така, било соопштено дека хрватските власти покренале обвиненија против 22 воени ветерани, поради насилното отстранување на двојазичните табли со кирилични натписи на државните институции во Вуковар./крај/мф/бс