Илјадници Унгарци протестираа во неделата поради најавениот данок за сообраќај на податоци на интернет, којшто, според нив, не само што дополнително ќе го преоптовари нивниот буџет, туку и ќе ги ограничи демократските права и слободи.

Владата на премиерот Виктор Орбан, кого многумина го обвинуваат за недемократски мерки, во вторникот го претстави планот за новиот данок. Нацрт законот предвидува интернет провајдерите да плаќаат данок од 150 форинти за гигабајт интернет сообраќај.Собирот во неделата го организираше група на Фејсбук којашто има повеќе од 210 илјади приврзаници. Демонстрантите, за коишто некои локални интернет страници јавија дека имало повеќе од десет илјади, се собрале пред министерството за економија. „Тој данок следи по бранот на противдемократски мерки на Орбан коишто Унгарија ја оддалечуваат од Европа“ вели во соопштението организаторот на собирот наречен „100.000 против интернет данокот“.„Оваа мерка ќе го наруши правото за пристап на интернет, ќе го продлабочи дигиталниот јаз меѓу економски силниот и слабиот слој на унгарското општество и ќе го ограничи пристапот до интернет на сиромашните училишта и универзитети“, додаваат оранизаторите.Во еден момент демонстрантите ги дигнале мобилните телефони и го осветлиле плоштадот пред министерството, а потоа оделе до Плоштадот на хероите во Будимпешта. Некои од нив заминале пред седиштето на партијата на Орбан и фрлале со стари делови од компјутери по зградата, при што скршени се некои прозорци.Организаторите и дадоа 48 часа рок на владата да го повлече спорниот закон и се заканија со нови протести во вторник.Партијата на Орбан во соопштение во неделата објави дека во понеделник во парламентот ќе поднесат амандман на тој закон и ќе го одредат максималниот износ којшто би го плаќале поединци. Според тоа соопштение, месечниот износ би бил ограничен на 700 форинти, интернет провајдерите би го плаќале данокот. Некои демонстранти велат дека новиот данок би бил олицетворение на погрешната владина економска политика. „Тоа за нас би бил двоен данок бидејќи јас веќе сум платил доста висок ДДВ кога сум ги купил компјутерот, рутерот.“ вели еден од демонстрантите./крај/хина