Српските функционери порачаа во разговорите со латвискиот министер за надворешни работи Едгарс Ринкевичс дека Белград ја докажал „апсолутната посветеност“ на патот кон Европската унија, со оцената дека сега би требало да реагира Брисел и да ги отвори првите преговарачки поглавја со Србија.

„Србија ја докажа својата апсолутна посветеност на патот кон рамноправно членство во ЕУ, и би било добро кога Брисел сега би покажат дека решителните чекори на Србија не биле попусто, така што наскоро ќе ги отвори првите поглавја“, изјави српскиот претседател Томислав Николиќ во текот на разговорите со шефот на латвиската дипломатија Едгарс Ринкевичс кој во средата пристигна во официјална посета на Белград, пренесува Танјуг.

Од кабинетот на српскиот претседател соопштија дека „таквиот потег на ЕУ би ги охрабрил граѓаните на Србија, би им покажал дека ЕУ ја посакува Србија“ во своето членство.

Николиќ истакнал дека Србија влегла искрено во дијалогот со Приштина, бидејќи извонредно е заинтересирана „за намалување на тензиите и за остварување на што е подобри услови за живот на сите граѓани кои живеат на Косово и Метохија, на што Србија ја обврзува и нејзиниот устав“.

Српскиот претседател истовремено нагласи дека Србија никогаш нема да ја признае независноста на Косово, како и дека „не е добро кој и да е да ги охрабрува властите во Приштина дека тоа е крајната цел на дијалогот кој се води“.

Ринкевичс, според истото соопштение, се согласил со Николиќ дека би било добро Брисел да покаже добра волја и наскоро да ги отвори првите поглавја, и изразил надеж дека тоа „наскоро и ќе се случи“, бидејќи е „очигледен напредокот кој Србија го направила во реформите“. Истовремено рекол и дека жали што тоа нема да се случи во текот на претседавањето на Латвија со Европската унија.

Претходно во средата шефот на латвиската дипломатија се средна и со српскиот премиер Александар Вучиќ кој го запознал со преземените реформи и напредокот во досегашниот дијалог меѓу Белград и Приштина за нормализација на односите, како и примената на Бриселскиот договор.

Ринкевичс, чијашто земја во моментов претседава со ЕУ, пред посетата на Србија во интервјуто за агенцијата Танјуг изјави дека Латвија и Советот на ЕУ го поддржуваат отворањето на првите поглавја во пристапните преговори со Србија што поскоро, со оцена дека успехот и брзината на тој процес „зависат од напредокот на Србија“, особено „во клучните поглавја на владеењето на правото и нормализацијата на односите со Приштина“./крај/мф/сн

Извор: Танјуг