Регион
Oбјавени имињата на министрите во новата српска влада

До претставниците на Собранието на Србија е поднесен предлог за избор на новата влада на Србија, а меѓу другите, како нови имиња се споменуваат Дејан Вук Станковиќ за министер за образование, Ненад Вуиќ за министер за правда и Драган Гламочиќ за министер за земјоделство, шумарство и водостопанство.
Претседателката на Собранието на Србија, Ана Брнабиќ, најави дека почетокот на седницата на Собранието на Србија, на која ќе се расправа за новата влада, ќе биде закажан за утре.
За премиер на владата на Србија беше предложен професорот Ѓуро Мачут.
Исто така предложени се:
Синиша Мали за прв вицепремиер и министер за финансии;
Ивица Дачиќ за вицепремиер и министер за внатрешни работи;
Адријана Месаровиќ за вицепремиер и министер за економија;
Драган Гламочиќ за министер за земјоделство, шумарство и водостопанство;
Сара Павков за министер за заштита на животната средина;
Александра Софрониевиќ за министер за градежништво, транспорт и инфраструктура;
Дубравка Ѓедовиќ-Хандановиќ за министер за рударство и енергетика;
Јагода Лазаревиќ за за министер за внатрешна и надворешна трговија;
Ненад Вуиќ за министер за правда;
Снежана Пауновиќ за министер за државна администрација и локална самоуправа;
Демо Бериша за министер за човекови и малцински права и социјален дијалог;
Братислав Гашиќ за министер за одбрана;
Марко Ѓуриќ за министер за надворешни работи;
Немања Старовиќ за министер за евроинтеграции;
Дејан Вук Станковиќ за министер за образование;
Златибор Лончар за министер за здравство;
Милица Ѓурѓевиќ-Стаменковски за министер за труд, вработување, бранители и социјална заштита;
Јелена Жариќ-Ковачевиќ за министер за благосостојба на семејството и демографија;
Зоран Гаиќ за министер за спорт;
Никола Селаковиќ за министер за култура;
Милан Кркобабиќ за министер за грижа на селото;
Бела Балинт за министер за наука, технолошки развој и иновации;
Хусеин Мемиќ за министер за туризам и млади;
Борис Братина за министер за информации и телекомуникации;
Дарко Глишиќ за министер за јавни инвестиции;
Новица Тончев за министер без ресор;
Ѓорѓе Милиќевиќ за министер без ресор;
Усаме Зукорлиќ за министер без ресор;
Ненад Поповиќ за за министер без ресор;
Татјана Мацура за за министер без ресор.
Се очекува седницата на Собранието да привлече големо внимание во јавноста со оглед на значајните промени во составот на владата и потенцијалните насоки на новата извршна власт, пишуваат српските медиуми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) На Крит како во Сахара, песок го покри познатиот остров, небото целосно ја промени бојата

Крит се чини дека се претворил во Сахара по огромниот бран прашина што го погоди островот во последните 24 часа, особено над Хераклион, објавува iefimerida.gr.
Градот беше покриен со прашина што пристигнала од пустината Сахара, а небото беше исполнето со ситни честички пренесени од Африка правејќи ја атмосферата задушлива.
The island of Crete in the Mediterranean Sea was covered by a cloud of sand from the Sahara Desert pic.twitter.com/tuMtI9WOpD
— Sprinter Observer (@SprinterObserve) May 26, 2025
Во исто време, возилата, куќите, дворовите, улиците, па дури и дрвјата, беа покриени со дебел слој африканска прашина, односно песок, според медиумот.
Жешкиот југозападен ветер и циклонот од Егејското Море повлекоа топол воздух и песок од Сахара, а температурата на Крит достигна 37 степени, а по продирањето на студениот фронт, се олади на 25 степени.
Според Action24, иако дебелиот слој африканска прашина не влијаел на земјоделските култури, интензитетот на феноменот ги принудил островјаните да користат голема количина вода за миење на куќите, дворовите и возилата поради што резервите во браната „Апоселеми“ значително се намалиле во последно време.
Регион
Пукање во близина на Сараево, голем конфликт меѓу Пакистанци и Авганистанци, шестмина повредени

Шест нелегални мигранти се повредени во прифатен центар во близина на Сараево за време на конфликтот што избувна во ноќта меѓу понеделник и вторник, потврдија полициски и болнички извори.
Според достапните информации, во меѓусебната пресметка меѓу мигрантите било употребено огнено оружје, а полицијата веднаш реагирала и започнала потрага по други учесници во судирот и сведоци.
Полициските службеници пронашле шест повредени лица на местото на судирот во прифатниот центар. Сите биле пренесени во болница, каде лекарите констатирале дека петмина од нив се здобиле со тешки телесни повреди, а двајца од нив се во критична состојба поради сериозноста на повредите.
Полицијата потврди дека во конфронтацијата учествувале мигранти од Пакистан и Авганистан.
„Полициската управа на округот Сараево моментално има неколку лица во статус на осомничени“, изјави портпаролката на полицијата Мерсиха Новалиќ.
Регион
„Европа нема да признае украдени избори“: Вучиќ доби предупредување од Париз и од Берлин

Франција и Германија му испратија пораки на српскиот претседател Александар Вучиќ дека резултатите од претстојните избори нема да бидат признати доколку има изборни нерегуларности или кражба на гласови, објави српска „Нова“.
Предупредувањата му биле пренесени преку политичари блиски до Фридрих Мерц од Германската Христијанско-демократска унија и лица поврзани со францускиот претседател Емануел Макрон, што дополнително го намалува просторот за манипулација на предвремените избори што ги побараа студентите.
„Неколку извори изјавија дека Европа нема да ги признае изборите ако бидат украдени, без оглед на одредени интереси што постојат. Исто така е можно Европската народна партија (ЕПП) да се дистанцира од Српската напредна партија (СНС), иако меѓу европските граѓани постои непишано правило да не се исклучуваат владејачките партии од членство“, изјави извор близок до дипломатијата.
На европско ниво, Брисел се соочува сè повеќе со избор помеѓу декларираните вредности на Европската Унија и интересите поврзани со експлоатацијата на литиум во Србија и француските воени договори, како што е купувањето на борбени авиони „Рафал“. Во исто време, во Србија се поставува прашањето дали студентските листи можат да победат во сегашните изборни услови.
„Во моментов, изборите се во центарот на вниманието. По долга пауза, повторно одиме на прошетка, но сега повеќе поради изборите, сме фокусирани на процесот и што можеме да направиме“, изјави за Н1 студент на Фармацевтскиот факултет за време на вчерашниот протест.
Според истражувањето спроведено од невладината организација ЦРТА, кај граѓаните постои изразено незадоволство, а разликата во поддршката помеѓу владејачката СНС и опозицијата се намалува. „Не знам дали победата на студентите е сигурна, но дефинитивно е можна. Рејтингот на СНС опаѓа и нема да се врати на нивото од пред 1 ноември“, истакна Душан Спасојевиќ од Факултетот за политички науки.
Тој предупредува дека најголемиот ризик за опозицијата е ако не успее јасно да се позиционира, ако некои од нив одат на избори, а некои не. „Ништо не може да го гарантира нивниот опстанок освен креирањето на сопствена листа. Проблемот е што локалните комитети може да ги поддржат студентите дури и ако формалните партиски лидери не го сторат тоа“, рече тој.