Турција поради под обвинение за врски со исламскиот клерик Фетулах Ѓулен кој живее во САД и кого го смета за организатор на неуспешниот воен удар од пред две седмици, од армиските редови исфрлила 1.389 луѓе, извести во неделата новинската агенција Anadolu.

Оваа вест за чистки во армијата дојде неколку часа откако турскиот претседател Реџеп Тајип Ердоган најави промени во вооружените сили, вклучително и затворање на воените школи, со што војската би била ставена под поцврста контрола на властите.

Анкара за неуспешниот обид за воен преврат од ноќта од 15-ти кон 16-ти јули во кој загинаа 246 цивили и стотина пучисти а околу две илјади луѓе беа ранети, го обвинува конзервативно исламскиот проповедник Фетулах Ѓулен кој од 1999 година живее во доброволен егзил во Пенсилванија и бара негово предавање од САД, додека овој повеќепати ги отфрли таквите обвинувања на негова адреса.

Ердоган во саботата предложи Генералштабот на армијата и раководството на разузнавачката служба да бидат ставени под контрола на кабинетот на претседателот на државата, но за тоа ќе биде потребно парламентот да прифати уставни промени.

Националната разузнавачка агенција познатата како MIT, во моментов е под контрола на премиерот. Војската традиционално има одреден степен на автономија во Турција и со предложените мерки вооружените сили би биле ставен и под цивилна контрола. Ердоган предложи копнените сили да бидат под контрола на министерството за одбрана.

Со предложените промени би биле затворени и воени школи кои би се преобразиле во структури според универзитетски принцип.

Западните сојузници на Турција го осудија обидот на воен удар, но изразуваат загриженост поради одговорот на турските власти на пучот.

Ердоган, меѓутоа, однесувањето на западот го оцени како „срамно“, бидејќи покажува поголем интерес за судбината на заговорниците, отколку за земјата која е членка на НАТО, прекорувајќи ги западните челници што по обидот за пуч не ја посетиле Анкара.

Наместо политички личности, во Турција во неделата би требало да пристигне командантот на здружениот штаб на американските сили Џозеф Данфорд./крај/мф/сн

Извор: Макфакс