Унгарскиот премиер Виктор Орбан го известил во четвртокот својот српски колега Александар Вучиќ дека Унгарија има намера да го усвои законот кој ќе овозможи испраќање воени единици во патролирање по должината на заедничката граница, пренесува унгарската агенција MTI.

Минатиот петок унгарската влада во парламентот го предаде нацрт законот со кој се предлагаат построи казни за илегално минување на нејзините државни граници, меѓу кои е и тригодишната затворска казна за лица кои ја минуваат границата со Србија.

Нацрт законот за кој ќе се дебатира во парламентот на Унгарија, предвидува 13 мерки кои би требало да овозможат ефикасно справување со незапаметениот бран бегалци во оваа земја. Владата предвидува построги казни за криумчарите на луѓе и одредување на подрачја за премин на границите за лицата кои бараат азил.

Во телефонскиот разговор од Брисел, унгарскиот премиер Виктор Орбан разговарал со српскиот премиер Александар Вучиќ за кризната ситуација предизвикана со масовната миграција на границите на Србија и Македонија, се цитира изјавата на Берталан Хаваси, шефот на службата за односи со медиумите во кабинетот на Орбан.

Орбан, како што истакнал Хаваси, го известил Вучиќ за подготвувањето на новиот закон за пограничните контроли, кои унгарскиот парламент наскоро ќе ги усвои, што овозможува испраќање на силни полициски и воени единици на границата со Србија од 15-ти септември.

Се очекува дека мигрантите и криумчарите на бегалците ќе побараат нови транзитни рути заобиколувајќи ја Унгарија, му кажал Орбан на Вучиќ, истакнувајќи дека „соседните земји мора да се подготват за таквата ситуација“.

Унгарија на 31-ви август треба го доврши градењето на 3,5 метри високата ограда по должината на 175 километри долгата граница со Србија./крај/мф/сн

Извор: Макфакс