Словенечкиот претседател Борут Пахор изјави дека новата словенечка влада, предводена од премиерот Миро Церар, има можност за „поправен испит“ за да ја извлече земјата од повеќегодишната криза.

Пахор смета дека има причини за „умерен оптимизам“, бидејќи новата влада го започнува својот мандат во време на активност во стопанстото, а својот оптимизам го темели на фактот што последните податоци говорат дека словенечкиот БДП е повторно во пораст и се намалил бројот на невработените.

„Имаме шанса за еден вид поправен испит, а можноста за успех е реална. Се наоѓаме на пресвртница кога можеме да се насочиме во вистинската насока, да го подигнеме животниот стандард и да го вратиме оптимистичкото расположение кај граѓаните“, изјави словенечкиот претседател, со предупредување дека високата задолженост на државата и компаниите, како и конзервативната кредитна политика на банките и натаму претставува главна препрека за развојот.

Пахор нагласи дека нвоата влада мора да ја искористи својата шанса и да ги спроведе неопходните структурни реформи за да ја зголеми економската конкурентност и да ги подобри условите во бизнис амбиентот, нешто што според него не им успеало на претходните влади за време на повеќегодишната економска криза, која сé уште трае, пренесува Hina.

Како што навел Пахор, економското опоравување коешто започнало во Словенија во 2011 година, додека тој бил на чело на владата, било прекинато поради тоа што не му успеало да ги спроведе структурните реформи, а потоа продолжила рецесијата.

Словенечкиот премиер Миро Церар порача дека главни приоритети на неговата влада ќе бидат излегувањето од кризата, рехабилитација на политиката како и борбата против корупцијата./крај/мф/бс