Осум пратеници на партиите на власт во Косово најавија дека ќе гласаат против демаркацијата на границата  со Црна Гора. Станува збор за пратеници на Демократската партија на Косово (ДПК) и Демократскиот сојуз на Косово (ДСК), односно гласови со кои фактички би се блокирало усвојувањето на документот за демаркација на границата меѓу Косово и Црна Гора. 

Според математиките на косовските медиуми за потребниот број на гласови за демаркацијата на границата со Црна Гора, преку гласањето против на како што се нарекуваат „непослушните осум“ пратеници на ДПК и ДСК се очекува да се блокира усвојувањето на документот со кој Косово ќе се согласи со најавената демаркација на границата.

Од раководствата на двете владејачки партии засега нема реакции и покрај тоа што според истите извори се вршат притисоци врз наведените пратеници за да се откажат од  гласањето против бидејќи без нив не е можно да се има двотретинско мнозинство. По најавите дека Косово ќе донесе документ за демаркација на границата со Црна Гора забележани се тензии на делови на границата со Црна Гора помеѓу месното население на Косово и црногорските гранични власти.

Премиерот на Косово Иса Мустафа изјави дека Владата во Приштина се согласува со демаркацијата на границата со Црна Гора бидејќи не губи ниту сантиметар  од својата територија, но косовоската опозиција и повеќе невладини организации се против демаркацијата за која велат дека е во интерес на Црна Гора, која добива нови територии./крај/мф/мн