Регион
Путин третпат во посета на Словенија
Во периодот кога односите меѓу Русија и Западот се затегнати, рускиот претседател Владимир Путин во саботата по третпат ќе ја посети Словенија, земја членка на НАТО и ЕУ, којашто Љубљана под притисокот на западните сојузници ја најавува само како комеморативна, а Москва и како работна.
За важноста којашто Словенија ѝ ја придава на доаѓањето на рускиот претседател Владимир Путин, зборуваат и големите безбедносни мерки, но и медиумското известување, бидејќи е предвидено целата посета да ја следи во директен пренос словенечката национална телевизија, што досега се има случено само во текот на двете посети на папата Јован Павле Втори.
Путин во Словенија ќе допатува во саботата околу 13 часот и на две места ќе им се поклони на советските и на руските војници загинати на словенечка почва во двете светски војни.
На превој Вршич, кај ткн Руска капела, ќе се одржи комеморација по повод стогодишнината од трагичниот настан, кога голем бројни руски воени заробеници во зимата 1916 година загинале во снежна лавина кога биле принудени да градат планински патишта.
На оваа свеченост говор пред околу 3.000 луѓе од словенечката општествена и политичка елита говор ќе одржи Владимир Путин, како и неговиот домаќин, словенечкиот претседател Борут Пахор.
Во текот на посетата на Путин на Словенија во саботата попладнето се очекува и негово кусо престојување во Љубљана, каде ќе им искаже почести на војниците на Црвената армија кои загинале на словенечка почва во текот на Втората светска војна, пред споменикот кој неодамна е подигнат на љубљанските гробишта Жале. Колонадата со осум столбови од словенечки мермер, на кои се запишани имињата на загинатите војници неодамна е поставена, а ја финансираше Руската Федерација.
Пред завршувањето на посетата во вечерните часови е предвидено Путин и Пахор да им се обратат на многубројните акредитирани новинари за овој настан на кој Словенија му придава голем значење и поради неговата промотивна вредност, бидејќи преку него земјата повторно се наоѓа во фокусот на светските медиуми.
Кон средината на март Пахор му упати писмо на Путин со кое го покани годинава кога се одбележува заокружена годишнина од трагичниот настан да присуствува на церемонијата на Вршич, и изјави дека тоа би било добро за европско-рускиот дијалог без разлика на разликите во гледиштата на меѓународните прашања кои постојат меѓу Словенија како членка на ЕУ и НАТО и Русија.
Медиумите потсетуваа дека станува збор за многу чувствително прашање, имајќи предвид дека рускиот премиер Дмитриј Медведев, ланската посета на Словенија ја искористи за да упати остри критики кон Европската унија поради наметнатите санкции кон Русија.
На надворешно политичките димензии од упатување на покана на Пахор за Путин, наводно на Минхенската безбедносна конференција на почетокот од март предупредила помошничката на американскиот државен секретар Викторија Нуланд, а мариборскиот дневен весник Večer пишуваше дека Американците стравуваат од „пробивањето“ на меѓународните санкции и политиката на изолација на Путин која е наметната токму со волјата на Вашингтон поради неговата политика во однос на конфликтите во Украина и во Сирија.
Вашингтон, наводно, потегот на Љубљана кон Москва го смета за оддалечување на ЕУ од американската стратегија на изолација на Русија, бидејќи посетите на руските функционери ова лето предвидуваат и некои други држави како Австрија а Финска на почетокот од јули веќе ја посети Путин.
Доаѓањето на рускиот претседател во Словенија во време на затегнатите односи меѓу Русија и Западот, во прв ред има комеморативен и пиететен карактер, поради 100-годишнината од подигнувањето на ткн Руска капела, но и потврда на традиционалното пријателство на двата народа и нивните држави, изјави Пахор во петокот за руската агенција ТАСС.
Повторно истакна дека Словенија вредносно, безбедносни и политички ја врзуваат членството во ЕУ и во НАТО, имајќи предвид дека во домашните политички кругови во периодот кога му беше упатена поканата на Путин имаше негодување поради „чувството на искокнување“ на Словенија од заедничките политики на ЕУ и НАТО кон Русија.
Според Пахор, пријателството со Русија продолжува и има традиција, и покрај сегашните различни ставови на двете држави околу некои актуелни прашања. „Мислам дека токму поради тие причини посетата на рускиот претседател на моја покана добива дополнително на значењето, со тоа го јакнеме уверувањето за неопходноста од дијалог“, вели словенечкиот претседател.
Путин во Словенија доаѓа во саботата околу 13 часот, по што од аеродромот Брник веднаш ќе се упати кон превојот Вршич кај Крањска Гора, на централната комеморативна свеченост. Пахор ќе го пречека Путин на Вршич, а не на аеродромот, со што Љубљана сака да означи дека посетата има „пиететен и приватен“ карактер, без политички ноти.
Поради тоа, на Путин ниту при доаѓањето ниту на заминување нема да му бидат искажани воени почести, што е вообичаено кога станува збор за високи гости во државничка посета, а не е предвидено ниту потпишување на никакви билатерални договори, ниту разговори на делегации на политички теми.
Москва, пак, на посетата ѝ дава изнијансиран и помалку поинаков карактер, па портпаролот на Кремљ, Дмитриј Песков во средата изјави дека посетата на Путин во Словенија, иако куса ќе има два аспекта. Од една страна, рече, таа е комеморативна, бидејќи се одбележува загинувањето на руските и советските војници на словенечка почва, а од друга страна има и работен дел, и Москва очекува разговори за меѓународни прашања, безбедноста и ситуацијата во регионот./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Момчето од „Рибникар“: „Да го немав пиштолот на татко ми, немаше да го направам масакрот“
„Да го немав пиштолот на татко ми, немаше да го направам масакрот. Оружјето ми беше на дофат“, ова, како што пренесува „Телеграф“, повикувајќи се на неофицијални информации во Специјалниот суд, го изјавил К. К. (14) додека сведочел во постапката против родителите Милјана и Владимир Кецмановиќ.
На овој начин, како што анализира медиумот, момчето ја префрлило одговорноста за масовното убиство во училиштето на својот татко.
Негативно зборувал и за мајката Милјана Кецмановиќ велејќи дека таа „постојано барала тој да биде најдобар во сè“. Како што наводно рекол, Милјана Кецмановиќ „се лутела кога не бил најдобар во нешто и го карала“ и истакнал дека токму однесувањето на мајка му го поттикнало масовното убиство.
Момчето на 3 мај минатата година во масакрот во основното училиште „Владислав Рибникар“ уби девет ученици и училишниот чувар, а денеска првпат се појави пред семејствата на убиените деца.
Следното рочиште е закажано за 17 октомври во зградата на Специјалниот суд во Белград.
Во Специјалниот суд во Белград денеска продолжи судењето на неговите родители Милјана и Владимир Кецмановиќ со распит на К. К., момчето што го изврши масовното убиство на 3 мај во основното училиште „Владислав Рибникар“. Нему му поставуваа прашања судијата, обвинителот, адвокатите на оштетените и прашања на еден член од семејствата на убиените, пренесува медиумот.
К. К. е изнесен денеска првпат од установата во која е задржан по кривичното дело.
Судењето продолжува на 17 октомври кога треба да продолжи распитот на К. К.
Регион
На хрватска граница запрена пратка со краставици од Србија: содржела зголемено ниво пестициди
Поради поголемо количество на пестицидот хлорпирифос од дозволеното, на хрватската граница е запрена пратка со зеленчук од Србија и е испратена на уништување, објави RASFF, европскиот систем за брзо предупредување и информации за храна.
Примерок од пратката со краставици од Србија е земен на 30 септември на хрватската граница и, како што е наведено на веб-страницата на РАСФФ, во него се откриени остатоци од пестициди поголеми од дозволената количина – 0,060 милиграми хлорпирифос на килограм (ppm), а дозволената количина е 0,01 милиграм на килограм (ppm).
Како што е наведено, на производот му е дозволено да патува до својата дестинација под царински пломби, а преземената мерка е уништување.
Пестицидот хлорпирифос (Хлорпирифос) е, инаку, забранет за употреба, а ова не е првпат да биде откриен во пратките со храна, пренесуваат медиумите во регионот.
Потсетуваат дека во август минатата година на хрватската граница во пратка со праски пристигната од Србија беше пронајдено високо ниво на пестицидот хлорпирифос, па стоката му беше вратена на испраќачот. Исто така, Германија во мај годинава од пазарот повлече и сув вргањ по потекло од Србија. Како што тогаш објави RASFF, во овие печурки биле пронајдени остатоци од пестицидот хлорпирифос. Остатоци од пестицидот хлорпирифос во суви печурки од Србија се пронајдени во количина од 0,18 ± 0,09 милиграми на килограм.
Регион
Aдвокатите по сведочењето на малолетниот убиец: од „Рибникар“: едно од најстресните рочишта во кариерата
Во Специјалниот суд заврши денешното рочиште од кривичната постапка против Милјана и Владимир Кецмановиќ, мајката и таткото на момчето, кое на 3 мај минатата година го изврши стравотниот масакр во основното училиште „Владислав Рибникар“. Продолжението на сведочењето на малолетниот убиец е закажано за 17 октомври, пренесуваат медиумите во соседството.
Дека денеска сведочеше малолетниот убиец, потврдија адвокатите, кои ја напуштија зградата на Специјалниот суд. Сепак, тие не сакаа да ги откријат деталите од неговата изјава.
„Преку прашањата што му беа поставени денеска не го дознавме мотивот и зошто тоа се случило, но мислам дека неговата денешна изјава оди во насока оти ќе се дознае. Неговото рочиште не е завршено и ќе продолжи на 17 октомври во истата зграда“, рече Огњен Божовиќ и додаде дека не смее да каже ништо повеќе со оглед на тоа што постапката е затворена за јавноста.
Адвокатката Зора Добричанин-Никодијевиќ по судењето изјави дека е задоволна од денешното рочиште и од сето она што денеска го дознале при сведочењето на момчето убиец.
„За време на сведочењето дознавме многу нови детали, но за тоа не можам и не сакам да зборувам“, изјави Зора Добричанин Никодијевиќ.
Ирина Боровиќ, која заедно со својот татко Боривој Боровиќ ги застапуваа Милјана и Владимир Кецмановиќ, по рочиштето изјави дека јавноста најмногу ја интересираат причините поради кои се случил овој трагично неразбирлив настан.
„Во оваа кривична постапка, ниту во која било друга постапка што се води во овој момент, ниту во оваа судница, ниту на кое било друго место, ние нема да ја дознаеме причината за овој трагичен настан. Сите причини се длабоко некаде во душата на тоа момче, кое, за жал, извршило злосторство, а пред тоа живеело сосема нормален и обичен живот од гледна точка на сите што го познаваат“, изјави Ирина Боровиќ.
Судењето беше затворено за јавноста, а ова беше првпат малолетниот убиец да ја напушта специјализираната детска установа во која се наоѓа од 3 мај минатата година. Тој денеска околу 9 часот со болничко возило на брзата помош во придружба на полиција бил донесен во судот.
Тој не одговара кривично за делото што го сторил на 3 мај минатата година бидејќи во моментот на делото имал 13 години.
Медиумите потстеуваат дека татко му Владимир Кецмановиќ е обвинет дека сторил тешко кривично дело против општата безбедност, со оглед на тоа што детето 13 години го носел на стрелиште и го учел да пука, оружјето не го чувал соодветно, а го имал во својот дом.
Мајката на момчето се товари за кривично дело недозволено држење, носење и тргување со оружје имајќи предвид дека нејзината ДНК-трага е пронајдена на еден од патроните во училишната училница, како и на лентата за коса со која било врзано шишето во кое нејзиниот син го правел „молотовиот коктел“, се наведува во написите.