Регион
Бугарија: Радев победи на претседателските избори, Борисов најави оставка

Кандидатот на Бугарската социјалистичка партија (БСП), генералот Румен Радев, е победник на претседателските избори во Бугарија, покажуваат првичните резултати од изборите, победувајќи го противкандидатот од владејачката Граѓани за европска Бугарија (ГЕРБ), Цецка Цачева со околу 22 проценти разлика, односно 58 наспроти 35 отсто.
Од Софија, Бојан Стојковски
Премиерот и лидер на ГЕРБ, Бојко Борисов, веднаш најави дека ќе поднесе оставка, со што земјата сега повторно влегува во политичка криза, но како што вели тој, по овие избои неговата партија веќе нема мнозинство, така што сега ќе ѝ дозволи на досегашната опозициска БСП да формира влада.
„Победата на Радев и БСП е категорична и јасна, ние ќе им дозволиме заедно со ДПС (Партијата на Турците) и со патриотите на (Красимир) Каракачанов да формираат формираат влада без избори. Ние сме партија што учи на своите грешки и ќе им дадеме шанса да формираат влада. Повторно сакам да кажам дека го поздравувам победниците на овие избори и им честитам“, изјави Борисов.
„Сакам да се заблагодарам за сите кои ни дадоа поддршка.
Јас сум човек кој сноси одговорност, по анализата во партијата јас сум подготвена да поднесам оставка од сите свои функции. Дел од вината е секако моја, важно е сега да се направи она што е добро за нашите граѓани“, изјави кандидатот на ГЕРБ, Цецка Цачева.
Борисов пред одржувањето на првиот круг од изборите минатиот месец најави дека доколку кандидатот на неговата партијата, Цецка Цачева, досегашен претседател на бугарскиот Парламент, не победи во првиот круг, тој и неговата влада ќе поднесат оставка. Цачева во првиот круг освои нешто повеќе од 21 процент, три помалку од нејзиниот противкандидат Радев. ГЕРБ на Борисов сега е во втората година од својот мандат, откако претходно на чело беше техничката влада на Пламен Орешарски, период во кој низ земјата постојано имаше протести./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.
Регион
Не успеа ниту новиот обид за избор на претседател на косовското собрание

Собранието на Косово и енеска не го избра Аљбуљен Хаџиу за претседател на собранието.
При гласањето Хаџиу доби поддршка од 54 пратеници, 44 беа против, а три лица беа воздржани.
За него гласаа пратениците на Самоопределување, како и пратениците на малцинските заедници, освен Адем Хоџа, кој гласаше против.
На седницата не учествуваше пратеничката Дуда Баље, која досега гласаше против.
Против гласаа членовите на Демократската партија на Косово, Демократскиот сојуз на Косово и Алијансата за иднината на Косово.
Претставниците на досегашната опозиција, по седницата, изјавија дека сè ова личи на театар и ја обвинија победничката партија дека намерно го спречува конституирањето на парламентот бидејќи нема гласови за формирање на новата влада на Косово.
Од друга страна, Самоопределување ги обвини пратениците на поранешната опозициска партија дека го блокираат нивниот предлог.
Продолжението на конститутивната седница на косовскиот парламент е закажано за 1 мај.
Регион
По две недели, студентите ја прекинуваат блокадата на РТС

Студентите во Белград вечерва објавија дека ја прекинуваат блокадата на зградата на Радио и телевизија на Србија, објави Б92.рс.
Тие на социјалните мрежи објавија дека ја прекинуваат блокадата што беше воведена од 14 април, откако Комисијата за култура и информации донесе одлука за откажување на стариот конкурс и распиша нов конкурс за избор на членови на Советот на Регулаторното тело за електронски медиуми (РЕМ).
Министерот за информации и телекомуникации, Борис Братина, синоќа изјави дека верува оти распишувањето на нов конкурс за избор на членови на советот на РЕМ, кој беше поставен како услов за прекин на блокадата на РТС, нема да ја заврши кризата околу јавниот сервис.
„Прво, оние што протестираат пред РТС всушност се на погрешна адреса. Бидејќи РЕМ се наоѓа на различна адреса од РТС, и тоа е она што всушност најмногу ги интересира, како и многу други. Генерално, тоа е еден вид борба за тој РЕМ, бидејќи највредните работи таму се всушност овие природни ресурси, со други зборови, фреквенциите што ги доделуваат“, истакна Братина.
Тој рече дека Владата добила писмо од директорот на РТС, во кое се наведува дека новинарите немаат услови да работат од дома, дека ситуацијата е тешка, дека програмата е доведена во прашање, но дека никаде не е наведено зошто.
Поради блокадата, РТС ја емитува својата програма според изменет распоред, а јавниот медиумски сервис објави дека вработените вложуваат големи напори за реализација и емитување на програмата, и покрај, како што велат, нелегалната блокада на зградата, студиото, емитувачката и другата опрема, како и прогонот на новинарите и снимателите на терен.