Албанскиот премиер Еди Рама во четвртокот во Белград ја повика Србија што поскоро да го признае, истовремено нагласувајќи дека силно го поддржува дијалогот помеѓу Белград и Приштина, пренесуваат српските медиуми.

„Косово е прашање околу кое немаме целосна согласност, бидејќи мојот став е дека доколку Србија што поскоро го признае Косово, тоа ќе биде добро за сите. Но истовремено постои процес кој целосно го поддржувам, а тоа е дијалогот како важно средство врз кое ќе се заснова моќта во иднина“, рекол Рама во дебатата за српско-албанските односи, заедно со српскиот премиер Александар Вучиќ.

Коментирајќи го спорот на Белград и Приштина околу рудникот Трепча, Рама изјавил дека тој се наоѓа на територијата на Косово и дека им припаѓа на граѓаните на Косово. „Да не сакате можеби да го префлите? Луѓето мораат да сфатат дека рудниот Трепча е на територијата на Косово и дека им припаѓа на граѓаните на Косово, без оглед на тоа дали се Албанци или Срби“, рекол тој.

На отворањето на Белградскиот безбедносен форум, Рама рекол дека процесот на евроинтеграцијата е пат на модернизација на општеството, кој е поважен и од самото членство во ЕУ, бидејќи помага во градењето на институции, владеење на правото и фунционална демократија.

„Луѓето во овој регион имаат различни мислења за Вашингтон, Брисел, Москва но мораат да разберат дека нема друг механизам кој ќе ни овозможи еднаш засекогаш да се оттргнеме од патот на историјата и конечно да се модернизираме и да живееме во современо доба“, рекол Рама.

Осврнувајќи се на реформите на правосудството во Албанија, Рама рекол дека било направено нешто што претходно било незамисливо за оваа земја, односно спроведување на уставните реформи и донесување на бројни закони кои радикално го прекинале односот со лошото минато./крај/мф/бс