Министерството за внатрешни работи на ентитетот Република Српска ја подигна готовноста на своите единици на највисок степен по петочните терористички напади изведени од радикални исламисти во Тунис, Кувајт и Франција, и забележливи се припадниците на полицијата со „долги цевки“ во центарот на Бања Лука, известуваат во неделата тамошните медиуми. 

Полицајци вооружени со автоматски пушки и со кучиња се поставени пред сите поважни институции на Република Српска. Според Независне новине, силно полициско обезбедување има пред зградата на Палатата на Република Српска, владата на ентитетот и објектите на министерството за внатрешни работи во Бања Лука.

Според полициски извори, станува збор за превентивни мерки, кои во прв ред се однесуваат на институциите на Република Српска, коишто ги штитат припадниците на полицијата. Каналот Алтернативна телевизија наведува дека од министерството за внатрешни работи не појасниле дали имаат конкретни информации за можен терористички напад на подрачјето на Босна и Херцеговина или во српскиот ентитет.

Повеќе десетици луѓе беа убиени во петокот во терористичките напади врз странски туристи во Тунис, врз шиитски верници во џамија во Кувајт, како и во американска гасна постројка во Франција. За сите три напада одговорноста ја презема џихадистичката терористичка организација Исламска држава.

Кон крајот на април во терористички напад врз полициската станица во Зворник, во источниот дел од Република Српска, кој го изведе припадник на радикалното исламистичко движење вехаби, Нередин Ибриќ, беше убиен еден а раните двајца српски полицајци, по што беше убиен од полициајта./крај/мф/сн

Извор: Hina