Проширувањето на НАТО со Црна Гора е еден од начините за да се сузбие руското влијание во Европа, оценил републиканскиот кандидат за претседател на САД, Марко Рубио, пренесува Телевизија Црна Гора.

Во авторски текст насловен „Мојот план за Европа“, Рубио навел дека НАТО мора да се прошири и истакнал дека сојузниците треба да ги надминат препреките за проширувањето пред следниот самит на НАТО.

„Тоа вклучува повик до Црна Гора да ѝ се придружи на Алијансата и потврдување дека политиката на отворени врати и понатаму е на сила, а се однесува на сите НАТО аспиранти, вклучувајќи ги и Црна Гора, па и Украина, доколу таа така одлучи“, напиша Рубио во колумната.

Рубио смета дека задачата е повоена Европа да се поврзе со Америка и да докаже дека во деценискиот судир меѓу Истокот и Западот, НАТО е центарот на сигурност, што најдобро ќе се постигне преку ширењето на тој воен сојуз. Според него, за сузбивањето на преголемото руско влијание во Европа неопходно е и останатите да се вклучат во проширувањето на постоечките санкции кон Русија.

Кандидатот за претседател на САД исто така смета дека неопходно е воено јакнење на источна Европа. Наместо привремено воено присуство на војниците кои се распоредени на НАТО границата, САД треба да соработува со европските држави, со што европската безбедносна иницијатива би добвела до трајна и сигурна одбрана на ова подрачје./крај/мф/бс