Русија за прв пат и сугерирала на Босна и Херцеговина (БиХ) дека не би требало да се ограничи само на евроатланските интеграции, пишува бањалучкиот весник „Независне новине“.

Според пишувањата на весникот, ова било сугерирано на заседанието на Управниот одбор на Советот за спроведување мир, кој оваа недела се состана во Сараево на ниво на политички директори.

„Независне новине“ наведува дека западните медиуми ваквиот потег на Русија го толкуваат како директна најава дека Русија „раскрстила со Западот и давањето на поддршка за реформите во БиХ со цел интеграција во Европската унија“.

Од друга страна, рускиот амбасадор во БиХ, Петар Иванцов истакнал дека народите во Би имаат право да изберат која интеграција ја сакаат, но дека е „евидентно дека разговорите за членството во ЕУ се во застој“.

Во интервју за „Независне новине“ Иванцов изјавил дека во последните пет години, две европски иницијативи – бутмирскиот процес и имплементацијата на одлуката „Сејдиќ – Финци“, биле неуспешни и дека смета оти нити новата британско-германска иницијатива „не нуди ништо конкретно, освен тоа политичарите да потпишат некаков документ за некој иден европски напредок“.

„Ако тоа е нешто луѓето во БиХ навистина го сакаат, тогаш Русија нема ништо против“, навел Иванцов.

Рускиот дипломат смета дека БиХ треба да се поврзе и со другите земји како на пример Кина, која е силно присутна во енергетиката и изградбата на инфраструктурата, потоа Турција за чии инвестиции се тврди дека се наоѓаат во секој град, особено во Федерацијата БиХ, како и Русија, потсетувајќи дека благодарение на руските компании во БиХ, секоја година буџетите на БиХ и ентитетите добиваат 250 милиони евра врз основа на данокот./крај/мф/бс