Регион
Русија со поддршка за Србија во штитењето на својот суверенитет

Определбата на Белград за членство во Европската унија (ЕУ) не се смета како пречка за зајакнувањето на односите со Русија, изјавил официјалниот претставник на руското Министерство за надворешни работи, Александар Лукашевич, пренесува Танјуг.
Лукашевич додал дека Србија и натаму може да смета на поддршката на Москва за заштитата на својот суверентитет, кога се работи за Косово. Во пресрет на посетата на шефот на руската дипломатија Сергеј Лавров на Србија, Лукашевич истакнал дека политичкиот дијалог на највисоко ниво помеѓу двете земји е неопходен импулс за подобрување на билатерните односи.
Лавров потсетил дека претседателите на Русија и Србија оваа година веќе оствариле две средби, во Ереван и во Москва.
„Тоа што во јубилејните свечености по повод Денот на победата учествуваше лидерот на Србија, чиј народ се красеше со хероизам и самопожртвуваност во борбата против нацистичкото зло, го потврди пријателскиот карактер на односите меѓу нашите земји. Симболично беше и марширањето на подешалон од српската гарда на Црвениот плоштад за време на парадата на 9-ти мај“, оценил Лукашевич.
Според него, посетата на Лавров на Белград ќе овозможи со српското раководство да се споредат ставовите за основите аспекти од билатералните и меѓународните односи, како и да се оцени динамиката на реализациајта на претходно постигнатите договори и планирањето на понатамошните односи./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Украинско комбе се судри со руски камион во Словенија, петмина загинати

На автопатот кој ги поврзува Марибор и Љубљана, во близина на излезот Словенска Коњица, во правец на Љубљана, се случи тешка сообраќајна несреќа во која загинаа пет лица, а две се повредени. Несреќата се случила кога патничко комбе удрилo во камион. Сите жртви биле странски државјани, соопшти словенечката полиција, јавуваат медиумите во регионот.
Според досега утврденото, возачот на комбе со украински регистарски таблички, кое превезувало седум лица, поради несоодветна брзина, удрил во задниот дел од приколка која стоела во ред поради работи на автопат. Пет лица загинале во комбето на местото на несреќата.
Возачот, кој ја предизвикал несреќата, е полесно повреден, додека патничка е тешко повредена. Двајцата повредени се пренесени во болница, а тешко повреденото лице е пренесено со хеликоптер. Идентитетот на загинатите сè уште се утврдува.
Возачот на камионот, руски државјанин, не е повреден, но му е понудена психолошка помош поради сериозноста на несреќата, објавува Радиотелевизија Словенија. Несреќата се случила непосредно пред одморилиштето Тепање, на дел од автопатот каде што се во тек големи работи – се реновираат 13 километри пат, два тунела и три вијадукти. Полицијата потврди дека несреќата се случила пред работната зона каде што се формираат долги редици поради затворени ленти.
Фото: принтскрин
Регион
Млад човек се удави во Улцињ: трагедија во Црна Гора

Млад човек се удави во Улцињ денеска, во попладневните часови, јавуваат медиумите во регионот.
Според написите, давењето се случило на „Големата плажа“.
Засега нема информации за идентитетот на загинатиот.
Според последните извештаи било подигнато црвено знаме бидејќи имало големи бранови во морето.
Регион
Србија им препорачува на граѓаните да не патуваат во Хрватска на почетокот на август

Министерството за надворешни работи на Србија им препорача на граѓаните на Србија да се воздржат од патување во Хрватска во периодот од 1 до 10 август.
Во соопштението Министерството им советува на граѓаните што ќе бидат на територијата на Хрватска во тој период да избегнуваат собири и други јавни собири, кои може да носат ризик од инцидентни ситуации.
Во тој период – на 5 август, Хрватска ја одбележува годишнината од воено-полициската операција „Бура“. Прославата се одржува на денот кога завршила акцијата. Во Србија годишнината од „Бура“ е на 4 август, денот кога почнала, како ден на сеќавање на жртвите и протераните Срби.