Регион
Србија месецов ги отвора поглавјата 32 и 35 од преговорите со ЕУ

Србија на 14-ти декември ќе ги отвори поглавјата 32 и 35 од пристапните преговори со Европската унија (ЕУ), изјавила во четвртокот во Белград високата претставничка на Унијата за надворешна и безбедносна политика, Федерика Могерини, пренесуваат српските медиуми.
По состанокот со српскиот премиер Александар Вучиќ за време на Министерскиот совет на ОБСЕ, Могерини изјавила дека ова е доста значајно за Србија, но и за ЕУ, додавајќи дека после ова соработката ќе биде уште подобра.
Германскиот министер за надворешни работи Франк-Валтер Штајнмаер, пак, по состанокот со Вучиќ рекол дека почитувањето и поддршката за Србија не се согледува само во бројките, туку и низ поддршката од меѓународните и финансиските институции, ММФ и Светската банка, како и низ позитивната оценка на Европската комисија (ЕК) за напредокот на Србија и отворањето на преговарачките поглаавја.
„Честитам за досегашните резултати и сигурен сум дека ќе продолжите на патот кој го поминавте во последните месеци и години“, изјавил германскиот министер.
Српскиот премиер Вучиќ додал дека Германијата е најважната земја за Србија, бидејќи таа е земјата која во ЕУ ги носи клучните одлуки околу евроинтеграциите на Србија.
„Благодарен сум му на Штајнмаер и Германија за поддршката за нашата земја кон европскиот пат. Ние на 14-ти декември ќе ги отвориме поглавјата 32 и 35, кои се однесуваат на јавните финансии и на Косово“, порачал Вучиќ./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Осум од повредените во Кочани се во „Пирогов“ во Софија, три се деца, сите се во тешка состојба

Осум од повредените во пожарот во дискотеката „Пулс“ во Кочани се во тешка состојба во Софија во болницата „Пирогов“. Од нив три се деца на возраст од 15-16 години – две девојчиња и едно момче, објави БГНЕС.
Ова утрово го соопшти д-р Валентин Димитров, директор на „Пирогов“ – една од болниците каде што беа пренесени дел од повредените во трагичниот инцидент во Македонија, пренесе БГНЕС.
Уште петмина од примените во „Пирогов“ – четири мажи и една жена се во тешка општа состојба. Едно од децата е на интензивна нега. Тројца се интубирани. Изгореници има на горните екстремитети и лицето, објасни д-р Димитров.
Останатите повредени во Кочани, транспортирани во Бугарија, се сместени во Варна и Пловдив.
Д-р Валентин Димитров најави дека во моментов нема итна потреба од дарување крв за настраданите, но секогаш има потреба од крводарители. Тој апелираше да не престанува крводарителството. За повредените од Кочани, центрите за крв во Пловдив, Стара Загора и Софија се подготвени да одговорат на она што е потребно.
Регион
(Видео) Тројца пациенти од Кочани се примени во болница во Варна

Тројца повредени во пожарот во Кочани вчера се примени на Клиниката за изгореници при ВМА-Варна, јави Бгнес.
Тие беа пренесени во Варна со воениот авион Спартан, кој првично слета во Софија, каде што пет пациенти беа сместени во болницата Пирогов.
Бугарија се обврза на лекување на 14 повредени во пожарот во Кочани.
Во пожарот што избувна во дискотека во Кочани животот го загубија 59 лица.
Регион
Авион на српската армија со 12 повредени во пожарот во Кочани пристигна во Белград

Дванаесет пациенти повредени во пожарот во дискотека во Кочани вчера вечер се пренесени од Македонија во Белград со авион CASA C-295 на српската армија, кои ќе бидат згрижени во Воената медицинска академија и во Клиничкиот центар на Србија, јави Танјуг.
Претходно, авион со четворица лекари и четворица медицински техничари полета за Македонија за медицинска евакуација на повредените во несреќата. Двајца пациенти кои претходно биле пренесени од Македонија со воени амбулантни возила се на лекување во Воената болница Ниш и Клиничкиот центар Ниш. За да им се пружи помош на повредените, планирано е двајца лекари од ВМА (пластичен хирург и анестезиолог) и еден медицински техничар – инструмент-оператор да останат во Македонија, пренесе српски Телеграф.
Најмалку 59 лица загинаа во пожарот што избувна ноќта меѓу саботата и неделата во дискотеката „Пулс“ во Кочани.