Организатори на обидот за терористички напади во Црна Гора, на денот на парламентарните избори на 16-ти октомври, биле и двајца националисти од Русија, соопштило црногорското Специјално обвинителство, пренесува Танјуг.

Целта на акцијата било рушење на актуелната власт и ликвидација на црногорскиот премиер Мило Ѓукановиќ, соопштил на вонредна конференција во понеделникот главниот специјален обвинител Миливоје Катниќ, истакнувајќи дека информации околу тоа дека во акцијата биле вклучени и државите Србија и Русија, со кои црногорските власти соработуваат за решавање на овој случај.

Од страна на црногорското Специјално обвинителство било презентирано и триминутно видео за кое рекле дека е добиено од страна на безбедносните служби на Србија, а во кое е прикажан запленетениот материјал од уапсените лица. Катниќ рекол дека нивната цел била ликвидација на Ѓукановиќ, за насилно рушење на власта  и оневозможување Црна Гора да стане дела од НАТО. Терористичката група ја сочинувале државјани на Русија, Србија и Црна Гора, рекол главниот специјален обвинител.

„Планот бил по изборите во 23 часот криминалците да се инфилтрираат во граѓаните и откако политичарите ќе излезат на бината, сите да влезат во Собранието и да се задржат најмалку 48 часа. Биле ангажирани и снајперисти кои би го ликвидирале Мило Ѓукановиќ“, навел Катниќ. Тој додал дека во обидот за тероризам била вклучена и политичка структура од Црна Гора. За осомничените руски државјани, пак, тој рекол дека не знае каде тие се наоѓаат во моментов.

„Специјалното обвинителство на Србија ги имаше овие лица под свој надзор. Тие веќе не се наоѓаат на територијата на Србија. БИА ги контролираше, но тоа не може да се искористи како доказ, нити тие можат да се лишат од слобода. Дали се наоѓаат во Русија или на некое друго место, не знам“, рекол Катниќ.

Во видеото добиено од српските безбедносни служби, пак, бил покажан арсенал на жилети, жици, војнички униформи, палки, мотороли за комуникацијаа, лисици, прачки, спрејови и дронови. Катниќ додал дека двете лица од Русија биле контактирани од страна на едно лице кое во случајов е обвинето за организација на криминално дела и дека му дале пари на територијата на Србија да организира криминална група од 500 членови. Тој додал дека во овој момент немаат докази дека позади овој план стојат државите Србија и Русија.

„Нема докази дека државата Русија е вмешана во ова и ќе ја продолжиме соработката со руските колеги. Се докажа дека лицата се националисти и дека нивната цел била сопирањето на Црна Гора на патот кон европските интеграции“, прецизирал Катниќ./крај/мф/бс