Премиерите на Турција и на Грција, Ахмед Давутоглу и Алексис Ципрас во средата рекоа дека гледаат можност за решавање на 40 години долгата поделба на Кипар, а Атина најави поддршка за Турција да стане членка на Европската унија.

Oдносите помеѓу овие две членки на НАТО долги години се оптоварени со спорови околу границата во Егејското море, но поради мигрантската криза Давутоглу и Ципрас во последно време остваруваат редовни телефонски контакти.

„Токму сега се покажа можност за решавање на кипарското прашање. Преговорите продолжуваат. Имаме заеднички пристап со Грција за тоа како позитивно да придонесеме за разговорите, изјави Давутоглу на заедничка прес конференција со Ципрас, кој е во посета на Турција.

Кипар е поделен по етнички критериум од турската инвазија од 1974 година.

Европската унија ја признава владата на кипарските Грци како легитимна и тој дел стана членка на ЕУ.

„Ќе вложуваме напори за да ги охрабриме двете заедници на Кипар да донесат одржливо решение“, рече Ципрас.

„Верувам дека се доближуваме до решение, не би бил преоптимистичен, умерен сум оптимист, но верувам дека мораме да поттикнеме решение“, додаде Ципрас.

Претставник на кипарските Турци во средата за Reuters дека островот сега е најблиску да заврши поделбата и дека двете страни би можеле да го прецизираа текстот на спогодбата во мај.

Ципрас, не наведувајќи детали, рече дека Грција  „во позитивно светло гледа“ на тежнеењето на Турција да стане полноправна членка на ЕУ ако ги исполни условите.

Двете држави мораат да ја зајакнат соработката во борбата против криумчарите кои стотици илјади бегалци и мигранти ги префрлуваат од турција преку Грција до Европа. /крај/мф/ап

Извор: Макфакс