Регион
Турција уапсила 45 нови борци на IS на пат кон Сирија

Турските безбедносни служби уапсиле последните три дена во градот Газиантеп во југоисточниот дел од земјата 45 странци кои имале намера да ѝ се придружат на џихадистичката организација Исламска држава во Сирија.
Како што објави во неделата приватната новинска агенција Dogan, оваа операција најверојатно значи дека Турција ја интензивирала борбата против Исламската држава, по големата операција којашто беше спроведена во петокот во четири градови, вклучително и мегалополисот Истанбул, во која беа уапсени 21 припадник на оваа радикална исламистичка сунитска организација, од кои тројца беа странци.
Газиантеп е местото на кои новите борци на Исламската држава преминуваат на територијата на Сирија. Во градот пристигнуваат со автобуси на меѓуградските линии, а потоа илегално ја минуваат границата. Агенцијата вели дека на меѓуградската автобуска станица само во неделата биле уапсени 25 странци, главно државјани на Таџикистан. Многу од нив во Турција допатувале со жените и децата.
Турските медиуми последните две седмици пишуваат дека владата во Анкара планира воена операција на територијата на Сирија, за наводно да ги потисне џихадистите подалеку од турската граница. Меѓутоа, аналитичарите предупредуваат дека таа акција има и цел да се нанесат удари врз силите на владата на сирискиот претседател Башар ал-Асад кој ја обвинува Турција дека со своите тајни служби и со оружје го покренала бунтот на сунитите во март 2011 година, кој потоа се претвори во меѓуконфесионален судир. Но најмногу на Анкара ѝ пречи напредувањето на сириските Курди кои веќе контролираат голем дел од турско-сириската 900 километри долга граница.
Турскиот премиер Ахмет Давутоглу, меѓутоа, минатата седмица изјави дека неговата земја, иако ги зајакнала безбедносните мерки по должината на границата со Сирија, вклучително и со тенковски и артилериски единици, не планира наскоро воена операција на територијата на соседната држава.
Мерките против џихадистите во Турција се засилени откако Анкара оваа седмица ја посети делегација на високи американски функционери, потсетува Reuters. Двете страни се договорија да ја зајакнат меѓусебната соработка во борбата против Исламската држава./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Реков дека нема помилување и се чувствував лошо, ова се наши деца

Српскиот претседател Александар Вучиќ синоќа изјави дека можеби ќе помилува некои од уапсените студенти, иако пред неколку дена изјави дека нема да го стори тоа.
„Размислував за тоа пред неколку дена. Реков дека нема да има помилувања и се чувствував лошо. Ова се наши деца, можам да им помогнам. Можам да одам подалеку од мојот збор за да ги спасам животите на другите, бидејќи така како што размислуваат, нема да можат да најдат работа никаде. Ќе им остане дамка до крајот на животот“, рече Вучиќ, според Нова.рс.
Тој нагласи дека е претседател и на оние луѓе кои велат дека тој е дилер на дрога и дека неговиот татко не е негов татко. „Јас морам да се грижам за нив“, забележа тој, додавајќи дека тие паднале под влијание на „пропагандната телевизија на криминалец“.
Вучиќ се обрати во неделата, еден ден по масовниот студентски протест во центарот на Белград.
„Седум месеци терор се случуваат од група луѓе кои го зедоа законот во свои раце. Обвинителството мора да си ја заврши работата, доаѓа време за одговорност. Нема да потпишам помилувања, никаква аболиција“, рече тој во таа пригода.
Регион
Санторини и Миконос се најскапи: од денес, туристите плаќаат нов данок во Грција

Од денес, патниците на крузери ќе плаќаат данок од 20 евра ако патуваат до островите Санторини и Миконос, како и пет евра ако одат на други грчки острови, објави Министерството за финансии на таа земја.
„Како што диктира регулативата, оваа такса ќе се однесува на Санторини, Миконос и други острови во помала мера“, изјави претставник на Министерството за финансии, пренесуваат медиумите во регионот.
Грција минатата година донесе закон за да се обиде да го регулира пристигнувањето на големи бродови на популарните туристички дестинации и да ја олесни инфраструктурата.
Даноците ќе се наплаќаат од 1 јуни до 20 септември, а според регулативата, крузерите ќе ги плаќаат од сопствен буџет, а подоцна ќе ги вклучат во цената на билетот за патниците.
Патувањето со крузери станува сè попопуларно во последните неколку години, а приходите во овој сектор се зголемија за 22,4 проценти во текот на изминатата година.
Регион
Милановиќ: Лицемерни и неискрени ветувања за Украина за членство во ЕУ

Хрватскиот претседател Зоран Милановиќ денес изјави дека, за жал, Европската Унија со години убива некои земји, а за тоа недостига волја кај некои актери со одложување на нивните преговори.
„Тоа се Црна Гора, Албанија. Па во таа смисла легитимно е да се зборува за Украина во ЕУ, но можам да забележам дека тоа е земја чии територијални перспективи не се јасни. Таа е во војна, а што се однесува до општите услови за членство, не гледам дека ги исполнува. Тоа се фактите. Што ќе се случи потоа, ќе одлучи ЕУ“, рече Милановиќ.
Милановиќ им го кажа ова на новинарите откога го угости својот полски колега Петер Пелегрини одговарајќи на прашање за членството на Украина во Европската Унија.
„Искрено, мислам дека таквото ветување е лицемерно и неискрено. Ова е ставот кон Украина од првиот ден, од 2013 година. Многу зборував за тоа“, рече Милановиќ, а потоа продолжи да зборува за средствата за одбрана:
„Практично, ѝ дадовме на Украина 35 тенка подарок и ништо не добивме за возврат. Добивме трошки од Германија“.
„Способности, а не проценти, тоа е она што е важно“, рече Милаовиќ и продолжи:
„Разговарав со американскиот претседател Доналд Трамп кажувајќи му, без никаков сарказам, дека цените на оружјето треба да се намалат. Американците, Германците, Французите и Британците се како агенти за продажба на сопствените одбранбени индустрии. А ние, од друга страна, сме купувачи и купуваме неверојатно скапа стока кога ќе ја добиеме. Тоа се фактите и на оној што не му се допаѓа нека престане да живее во свет на фантазии“.
Тој исто така коментира за критиките дека словачкиот претседател Роберт Фицо е руски човек.
„Руски човек, што значи тоа? Го познавам. Тој не е руски човек, дури ни во однос на афинитетите, но во некои критични ситуации ќе се однесува како што се однесува“, рече Милановиќ.
Тој вели дека нема никаква врска со Русите, но не може да биде изненаден кога тоа доаѓа од луѓе што ги поминале своите кариери како руски пудлици.
„Дали е ова уреден начин на комуникација?“, праша претседателот на Хрватска и рече:
„Овие приказни дека сум руски човек се одвратни и доаѓаат од луѓе што треба да внимаваат што зборуваат“, објави хрватскиот портал „Дневник“.