Турската крајбрежна стража запрела во саботата 63 Палестинци и Сиријци кои се обиделе да преминат на еден грчки остров, покажувајќи ја големината на задачата на безбедносните сили во обидот да ги увери илегалните мигранти дека нема да им биде дозволен влезот во Европската унија.

Договорот меѓу Европската унија и Турција, според кој ЕУ ќе ги враќа во Турција азилантите на коишто нема да им биде одобрено барањето за азил, започнува да се применува од понеделник 4-ти април.

Групата којашто е запрена во саботата се обидувала да дојде на грчкиот остров Лезбос од турскиот град Дикили на брегот од Егејското Море. Мажи, жени и деца седеа во шаторите сокривајќи ги лицата со десетици портокалови појаси за спасување нафрлани пред нив.

Судирот околу тоа како да се реши проблемот со стотиците илјади имигранти од Сирија и другите земји од Блискиот и Средниот исток, како и од северна Африка, се заканува со раздор во Европската унија, а договорот со Турција го прави клучен за решавање на мигрантската криза.

Турција на самитот во Брисел во март се согласи да ги прими назад сите мигранти и бегалци кои илегално ќе минат во Грција по 20-ти март и на кои нема да им биде одобрено барањето за азил, а во замена за секој вратен ќе презема еден легален бегалец. Покрај тоа, Анкара ќе добие вкупна финансиска помош од шест милијарди евра, укинување на визите за турските државјани и забрзување на пристапните преговори за членство во ЕУ.

Илјадници мигранти и натаму се обидуваат на опасниот премин на морето, иако доаѓањата забавија. Повеќе од 1.900 луѓе успеале да дојдат во Грција оваа седмица и покрај лошите временски услови, а вкупно се регистрирани 5.622 од 20-ти март.

Турските власти не се изјаснуваат за своите планови, па не е јасно колку мигранти ќе бидат вратени назад, колку ќе бидат обработени и каде ќе бидат сместени. За некои се очекува дека ќе минат низ Дикили при враќањето од Лезбос, еден од грчките острови кој е најблизок до Турција. Во градот не се видливи никакви подготовки и не е резервиран теренот на кој би биле сместени, јавуваат агенциите кои ги упатија своите екипи во ова турско одморалиште.

Без разлика на тоа, неколку стотици луѓе протестираа против подигнување бегалски камп овој мал град. Некои велат дека бегалците треба да бидат чувани во главните логори во близина на Сарија./крај/мф/сн

Извор: Макфакс