Регион
Турските власти во Истанбул ќе го пуштат во употреба третиот мост преку Босфорот

Со пуштањето во употреба на третиот мост помеѓу Европа и Азија, Истанбул вечерва го добива третиот „ѓердан“ преку Босфор. Мостот кој го носи името на султанот Јавуз Селим и чија изградба започна во мај 2013-та година е завршен во рекордно време од 39 месеци пред планираниот рок за изградба, и веќе по повеќе особини го нарекуваат и мост на рекордите.
Со пуштањето во употреба на третиот мост помеѓу Европа и Азија, Истанбул вечерва го добива третиот „ѓердан“ преку Босфор. Мостот кој го носи името на султанот Јавуз Селим и чија изградба започна во мај 2013-та година е завршен во рекордно време од 39 месеци пред планираниот рок за изградба, и веќе по повеќе особини го нарекуваат и мост на рекордите.
Од Истанбул за Макфакс, Асуде А. Кочан
Со широчина од 59 метри тој го претставува најширокиот висечки мост во светот. Целокупната должина на мостот изнесува 2 илјади и 164 метра, а со должина од илјада и 408 метра над морската површина тој го претставува и најдолгиот висечки мост со систем на железница во светот. Мостот има осум ленти за автомобилски сообраќај и две траси за железнички сообраќај, кои сите се наоѓаат на исто ниво.
Новиот мост на Босфор е дел од Северниот Автопат „Мармара“ од чиј досега изграден дел од 116 километри 13,5 километри минува преку вијадукти, а мостот Султан Јавуз Селим се наоѓа во делот Одајери-Пашаќој. Во европскиот дел на проектот се завршени сите приклучни делници, додека во азискиот дел во почетната фаза возилата ќе преминува по одредени делници. Вкупната должина на автопатите од проектот е 157 километри кои се планира да бидат завршени до крајот на 2018-та година.
За импозантноста на проектот говорат следниве податоци: во целиот проект досега се потрошени околу 230 илјади метри кубни бетон, 50 илјади тони армирано железо, 57 илјади тона градежен челик, 28 илјади тони челични кабли 8 милиони метри кубни асфалт.
Изградбата на мостот чиј градител е холдингот ИЦА (ICA)чинеше 4 и пол милијарди долари и е дело на висока технологија и инженерство, по концесија од 10 години и два месеца мостот ќе му биде предаден на Министерството за сообраќај на Турција.
Новиот мост се очекува во голема мера да го олесни сообраќајот на мегалополисот кој брои 3 милиони и 771 илјада регистрирани возила. Ќе биде смален сообраќајот и на постарите два моста преку Босфор. Товарните сообраќајни возила кои досега поминуваа од вториот мост– мостот Султан Фатих Мехмед, ќе бидат пренасочени на новиот мост и ќе преминуваат на спротивната страна од Босфор без да влегуваат во Истанбул, што додатно ќе се смали оптовареноста на сообраќајот на метрополата.
Мостот ќе биде интегриран во железничкиот систем „Мармарај“ и истанбулското метро, со што ќе се поврзат аеродромите „Ататурк“ во европскиот дел на турската метропола, потоа „Сабиха Ѓокчен“ во азискиот дел и третиот истанбулски аеродром кој е во изградба.
Со железницата што ќе минува преку мостот практично ќе се носат патници од Едрене до Измит. Дневно се очекува премин од 135 илјади возила, преминот од европскиот кон азискиот дел за патнички возила ќе чини околу 3 евра, а за возила со голема тонажа ќе почнува од 4 евра, додека премините од Азија во Европа ќе бидат бесплатни.
На свеченото отворање на кое ќе учествуваат претседателот на државата Реџеп Тајип Ердоан, премиерот Бинали Јилдирим и претседателот на турскиот парламент Исмаил Кахраман се очекува присуство на претседатели на држави и високи државници од балканските земји – Македонија, Србија, БИХ и Бугарија како и од Индија, Северен Кипар, Грузија, Бахреин и министри за сообраќај и економија од многу земји од светот./крај/мф/аак
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Грција го усвои контроверзниот закон – отворен патот за 13-часовно работно време

Грчкиот парламент денес го усвои новиот закон за труд, кој предизвика бурни реакции и протести во целата земја. Со 158 гласа „за“ и 109 „против“ владиниот предлог беше изгласан, а левичарската опозициска партија СИРИЗА одби да учествува во гласањето.
Законот, кој според владата има цел да го направи пазарот на труд поприспособлив и поефикасен, им овозможува на работодавците во приватниот сектор да бараат од своите вработени да работат до 13 часа дневно наместо досегашните осум. Продолженото работно време може да се применува најмногу 37 дена годишно, а работниците се заштитени од отказ доколку одбијат да работат прекувремено.
Владата тврди дека со новите правила се зголемуваат флексибилноста и заштитата на работниците, особено оние со семејства, и дека законот дозволува четиридневна работна недела доколку има претходен договор меѓу работодавецот и вработениот.
Меѓутоа, синдикатите и опозицијата остро реагираа предупредувајќи дека реформата ја укинува суштината на осумчасовниот работен ден и ја легализира прекумерната експлоатација. Синдикатот на државните службеници ADEDY порача дека „флексибилното работно време во пракса значи уништување на семејниот и на општествениот живот и укинување на работничките права“.
Синдикатите потсетуваат и дека просечните плати во Грција се значително пониски од европскиот просек, а нерегистрираниот труд и натаму е голем проблем. Опозициските партии оценија дека законот е застарен и спротивен на европските тенденции за скратување на работното време и воведување пократка, но поквалитетна работна недела.
Новите одредби предвидуваат и поголема флексибилност при вработувања на определено време, со цел, како што наведува Министерството за труд, да се стимулираат продуктивноста и модернизацијата на пазарот на труд.
И покрај уверувањата на владата дека законот ќе ги заштити работниците и ќе овозможи подобра рамнотежа меѓу работа и приватен живот, јавноста останува поделена.
Регион
Вулин до фон дер Лајен: Побрзо ќе ја прифатите Турција во ЕУ отколку Србија да ја предаде Русија

Александар Вулин, кој во минатото извршуваше голем број важни функции во Србија, ги коментираше изјавите дадени од претседателката на Европската комисија, Урсула фон дер Лајен, за време на нејзината посета на Белград.
„Очекувам Европската Унија целосно да се усогласи со политиката на Србија, вклучително и повлекување на признавањето на таканареченото Косово, како и итно повлекување на сите одлуки што го кршат Дејтонскиот договор и ги намалуваат овластувањата на Република Српска. Госпоѓо фон дер Лајен, никој не нè праша дали сакаме да се впуштиме во авантурата за приклучување кон Европската Унија, но ви гарантирам дека ќе најдеме начин да ја прашаме Србија што мисли за продолжување на авантурата. И да не заборавам, попрво вие ќе ја примите Турција во Европската Унија отколку Србија да ја предаде Русија“, рече Вулин, пренесува „Телеграф“.
Фон дер Лајен разговараше со српскиот претседател Александар Вучиќ во Белград. На заедничката прес-конференција таа рече дека очекува Србија „да го започне својот пат кон Европската Унија двапати побрзо“.
„Нашите позиции се јасни и вклучуваат слобода, а не репресија, вклучително и право на мирно собирање, партнерство, а не потчинување, дипломатија, а не агресија“, нагласи фон дер Лајен, оценувајќи дека „сега е вистинското време Србија да преземе чекори кон пристапување“.
„Вреди да се вложи овој напор бидејќи се приближувате до целта. Потребно е да се забрзаат реформите во владеењето на правото, електронските медиуми, изборните закони и хармонизацијата со надворешната политика на Европската Унија“, изјави таа, истакнувајќи дека овие реформи бараат упорност, трпение, учество на сите сегменти од општеството и политичкиот спектар.
Регион
Вучиќ: Ова ќе биде тешка политичка зима за нас; Фон дер Лајен: Сметајте на ЕУ

Српскиот претседател Александар Вучиќ и претседателката на Европската комисија, Урсула фон дер Лајен, се обратија на јавноста по тет-а-тет средбата во Белград и одговорија на прашања од новинарите.
„Особено ми е драго што имавме можност да бидеме домаќини на претседателката на Европската комисија. Особено сум ѝ благодарен бидејќи таа дојде на територијата на Србија во неколку наврати, не само во нејзиниот главен град. За Србија, членството во ЕУ е стратешка определба и приоритет на надворешната политика. И тоа нема да се промени. Не сме отвориле ниту едно поглавје, ниту еден кластер од почетокот на конфликтот во Украина. Верувам дека она што е направено во однос на регулаторните агенции, избирачките списоци, ќе наиде на позитивна оценка. Сега се соочуваме со тешка ситуација. НИС е под американски санкции, а де факто е и под европски санкции.
Се надевам дека ќе ги имаме поддршката и помошта од ЕУ. Се надевам дека ЕК ќе најде начин да им олесни на земјите кандидатки. Обезбедивме доволни количини нафта и гас.
„Ќе биде тешка политичка зима за нас, во овој поглед ќе соработуваме тесно со луѓе од Европската Унија“, рече Вучиќ.
„Не дадовме многу оптимистички изјави за пристапувањето кон ЕУ.“ Денес не можам ништо да ветам, освен дека ќе работиме напорно и ќе се жртвуваме и се надевам дека ќе ја имаме поддршката од ЕУ за сето ова и дека ќе нè слушнат во Брисел. Не е толку едноставно. Знаете кои се двете клучни прашања за нас“, рече Вучиќ.
Тој рече дека разговарале и за зачувување на мирот и стабилноста во регионот, за дијалогот меѓу Белград и Приштина.
„Ќе кажам дека за танго се потребни двајца“, рече Вучиќ.
Претседателката на Европската комисија, Урсула фон дер Лајен, рече дека Србија може да продолжи да смета на Европската Унија.
„Србија го направи изборот да се приклучи на ЕУ и очекуваме Србија да го продолжи својот пат двојно побргу. Земете ја како пример енергетската криза во 2022 година, која имаше драстичен ефект и ние се соочивме со неа. Можете да продолжите да сметате на нас“, рече Фон дер Лајен и продолжи:
„Ја поврзуваме Србија со пазарот на енергија. Ја поканивме Србија да се приклучи на механизмот на ЕУ за набавка на гас. Треба да видиме напредок во областа на владеењето на правото, електронските медиуми. Сакам да го поздравам напредокот во врска со избирачките списоци и РЕМ. Би ве поканила да дојдете во Брисел за еден месец за да видите како стојат работите. Морам да ве пофалам за 61-процентно усогласување на надворешната политика со ЕУ. Како дел од планот за раст, формиравте надзорен комитет. Мислам дека тоа е одличен сигнал“.
На прашањето каде го гледа решението за моментната политичка ситуација во Србија, Фон дер Лајен вели:
„Ова е секако клучен момент за Србија. Време е целата нација да се обедини. ЕУ е подготвена да ве поддржи, целиот процес на пристапување е за тоа. Секој треба да учествува во процесот на реформи. Владата соработуваше со организациите на граѓанското општество. Медиумите и изборната реформа се нешто што ги интересира сите. Имплементацијата е најважна“.
Фото: принтскрин