Референдумот за бегалските квоти во земјите членки на Европската унија е невалиден и покрај огромното мнозинство избирачи кои ги отфрлија задолжителните квоти, бидејќи одѕивот на гласачите не надмина 50 отсто, објави во неделата унгарската Национална изборна комисија, а премиерот Виктор Орбан го поздрави како „извонреден“ резултатот и порача дека челниците на ЕУ мора да го земат предвид резултатот од гласањето. 
 

Референдумот за бегалските квоти во земјите членки на Европската унија е невалиден и покрај огромното мнозинство избирачи кои ги отфрлија задолжителните квоти, бидејќи одѕивот на гласачите не надмина 50 отсто, објави во неделата унгарската Национална изборна комисија, а премиерот Виктор Орбан го поздрави како „извонреден“ резултатот и порача дека челниците на ЕУ мора да го земат предвид резултатот од гласањето. 

„Тринаесет години откако големо мнозинство Унгарци гласаа на референдумот Унгарија да се приклучи на ЕУ, денеска Унгарците повторни се изјаснија за европското прашање. Постигнавме извонреден резултат, бидејќи го надминавме резултатот за приклучувањето“, изјави на прес-конференција унгарскиот премиер Виктор Орбан.

Орбан најави дека ќе поднесе уставен амандман за да ги озакони резултатите од референдумот, иако тој не е валиден бидејќи одѕивот на гласачите беше под минималниот праг од 50 отсто.

Според челничката на комисијата, Илона Палфи, врз основа на обработените 98,82 отсто од избирачкиот материјал, одѕивот изнесувал околу 3,2 милиони гласачи. А за референдумот да биде валиден, неопходно беше на избирачките места да излезат најмалку 4,5 милиони гласачи.

Од оние кои гласале, во неделата речиси 98 отсто ги отфрлиле бегалските квоти, што значи дека само 168.000 гласале за поддршка на бегалските квоти

Пратеникот на владејачката партија Фидеш, Гергели Гулјаш изјави дека одѕивот бил околу 45 отсто, како и дека над 95 отсто од оние коишто гласале ги отфрлиле квотите. За споредба, на парламентарните избори во 2014 година, одѕивот на гласачите беше 61,73 отсто.

Унгарскиот премиер Виктор Орбан, кој беше заговорник на одржувањето на референдумот кој го критикуваа челниците на ЕУ, при гласањето на гласачко место во едно основно училиште во Будимпешта рече дека клучниот момент треба да биде мнозинството на противниците на квотите на ЕУ од вкупниот број гласачи кои во неделата излегле на избирачките места.

Доминацијата на гласовите „против“ обезбедува доволна легитимност за активностите на парламентот и на владата, дури и доколку произлезе дека референдумот не е валиден според излезноста, смета унгарскиот премиер.

„Одржаниот референдум е подобар отколку неодржаниот, но во секој случај ќе има законодавни последици, бидејќи ја преземавме обврската да му го осигуриме на парламентот ексклузивното право да одлучи со кого Унгарците сакаат да живеат“, изјави Орбан.

Во неделата избирачите на Унгарија, којашто според планот на ЕУ за распоредување на 160.000 бегалци, одговараа на прашањето: „Дали сакате Европската унија да донесе одлука за преселување на лица кои не се државјани Унгарија во Унгарија и без согласност на Националното собрание (парламентот)?“.

Владата на Орбан се противи на задолжителните квоти за распределба на бегалците, која е осмисли за да се олесни товарот на јужните членки на ЕУ, Грција и Италија, а Орбан во саботата вечерта уште еднаш ги повика гласачите да ја исполнат својата „задача“ и да ѝ помогнат на владата против одлуките на „елитата од Брисел“.

Бегалската криза покажа длабока поделеност во ЕУ околу тоа како би требало да изгледа Унијата. Се мислеше дека распределбата на бегалците на дело ќе ја демонстрира европската солидарност, но наместо тоа сé повеќе се покажува длабоката поделеност.

ЕУ во јули 2015 година се обврза дека следните две години ќе размести 40.00 бегалци кои дојдоа во Италија и во Грција. Потоа бегалската рута од Средоземјето се префрли преку балканските земји, па Европската комисија предложи во програмата за преместување да се вклучи и Унгарија, од каде требаше да бидат релоцирани 54.000 луѓе. Унгарија тоа го одби и наместо тоа подигна ограда и ја сврти патеката кон Хрватска и Словенија.

Потоа ланскиот септември ЕУ се обврза дека дополнително ќе премести 120.00 луѓе, со што вкупната бројка за преместување се искачи на 160.000, во чии рамки се и оние 54.000 кои требаа да бидат преместени од Унгарија. Тогаш Советот на ЕУ прифати две обврзувачки одлуки за воспоставување привремени и вонреден механизам за преместување на 106.000 луѓе од Грција и од Италија, првите членки во кои бегалците влегуваат на територијата на ЕУ.

Одлуката за распределба на бегалците меѓу земјите членки беше донесена со просто мнозинство. Против таа одлука гласаа Чешка, Унгарија, Романија и Словачка, а Финска беше воздржана. Клучот за распределба по земјите членки ја зема предвид големината на земјата и нејзината економска моќ./крај/мф/сн

Извор: Макфакс