Четири нови смртни случаи како последица од пожарот во ноќниот клуб ноќта кон 31-ви октомври во романската престолнина Букурешт се регистрирани се последните 24 часа, со што бројот на жртвите се зголеми 50, објавија во средата болнички извори.

Две од лицата кои им подлегнале на повредите биле преместени во неделата во болници во Велика Британија, другите две се на лекување во Романија.

Од околу 150 од повредените веднаш по трагедијата, 35 беа префрлени во странство, во саботата 18 пациенти беа префрлени на лекување во Холандија, Белгија и Австрија, а во петокот и во Велика Британија, Израел, Норвешка и Финска, додека 76 останаа во романските болници во романските болници, од кои 15 се во критична состојба, како и оние кои се во странство, според бројките објавени во вторникот.

Според досегашните сознанија на истрагата, причина за пожарот било користење на пиротехнички средства, во текот на концертот во ноќниот клуб сместен во подрумски простории, без соодветни дозволи за исполнување на безбедносните стандарди и за организирање забави. Од него се запалиле запаливите материјали со кои биле обложени ѕидовите и таванот, а околу 400 лица се упатиле кон единствениот во тој момент отворен излез, поради што најмногу од жртвите починале во стампедото или од задушување.

Трагедијата којашто доведе до масовни протести и оставка на премиерот Виктор Понта, се случи во клубот „Colectiv“ кога романскиот хардрок бенд Goodbye to Gravity го промовирал својот нов албум. Од вторникот секоја вечер во Букурешт и другите големи градови на улиците излегуваат десетици илјади луѓе кои протестираат против корупцијата во романското општество, за која сметаат и дека довела до трагедијата во ноќниот клуб, и бараат остри казни за функционерите. Според извештаите на романските медиуми, по оставката на премиерот Понта бројот на демонстрантите се намалува и во саботата вечерта во главниот град се собрале околу две илјади луѓе, кои бараат предвремени парламентарни избори./крај/мф/сн

Извор: Макфакс