Млад Албанец од косовскиот град Гњилане бил убиен од снајперски истрел некаде на боиштата во Сирија, објавија џихадистичките портали без да наведат други детали, освен дека момчето кое го именуваат како Патриот Матоши се борел во редовите на муџахедините на Исламската држава (поранешната Исламска држава во Ирак и на Левантот – ISIL) во Сирија.

Како што пишува порталот Ummeta, близок на радикалните исламистички групи во БиХ и на Балканот, Матоши пред заминувањето во Сирија бил ученик на гњиланската медреса, а приштинските медиуми наведуваат дека бил „миленик на локалниот имам Зекрија Цази“. Се наведува и дека Лаврдим Муџахери, кој стана познат откако на интернет објави фотографии на егзекуција момченце во Сирија, бил сменет од местото командант на албанските борци кои се борат на страната на џихадистите. На негово место бил поставен извесен Ридван Хакифи. Според порталот, во редовите на џихадистите на Исламската држава во Ирак и во Сирија се борат неколку стотини доброволци од Балканот, вклучително и околу 150 Албанци.Косовската полиција соопшти дека во понеделник наутро уапсила 40 лица ширум Косово под сомнение дека учествувале во борбите во Сирија и Ирак и дека поддржувале терористички организации. Осомничените од Приштина, Пеќ, Гњилане, Урошевац, Призрен и Косовска Митровица, уапсени се по процената дека нивното делување ја загрозува националната безбедност и заштитата на уставниот поредок.Во соопштението беше наведено дека уапсените се приведени  на вкупно 60 локации ширум Косово под сомнение дека сториле кривично дело против уставното уредување и безбедноста на Косово. Од косовската полиција додаваат дека акцијата ќе продолжи.Во јануари годинава порталот на алабански јазик Portalb јави дека 22-годишниот Алим Османи од Скопје е четвртиот Албанец од Македонија кој загина во Сирија борејќи се на страната на Слободната сириска армија (FSA) против војската на владата на сирискиот претседател Башара ал-Асад. Веста тогаш ја потврдија неговите најблиски кои изјавиле дека Османи заминал во Сирија во средината на минатата 2013 година за да им се придружи на бунтовниците кои се борат против власта на Асад.Османи е четврт Албанец од Македонија, кој заина во војната во Сирија. Во мај 2013 година беше убиен 28-годишниот Расим Зеќири од гостиварското село Беловишта, кој подолго време живеел во Австрија. Осум месеци пред да биде убиен заминал за Сирија и се борел на страната на Џабха ал Нусра односно Фронтот ал-Нусра.  Потоа беше убиен оџата од Скопје, Сами Абдулахи. Тој загинал во жестоките борби меѓу сириските бунтовници и милициите на Курдите во Сирија кон средината на јули кај Рас ал-Аин каде им беше нанесен тежок пораз на борците на движењата Фронтот ал-Нусра во кој според разузнавачки информации се борат и платеници и исламски фундаменталисти од Босна и Херцеговина, јужна Србија, Косово и Македонија.Што се однесува до регионот, пак, кон крајот на ланскиот февруари загина и 23-годишниот етнички Албанец Мират Ахмети од селото Велики Трновац кај Бујановац, во јужна Србија кој според локалните медиуми бил убиен во борбите во Сирија. Пред да замине на фронтот во Сирија тој бил одличен ученик и успеал да се запише на студии по теологија на престижниот исламски универзитет Ал Ажар во египетската престолнина Каиро, а на сириските бунтовници им се придружил заедно со други негови колеги од трета и четврта година на студиите.Медиумите претходно јавуваа и за убиени Албанци од Косово, во борбата против режимот на претседателот Башар ал-Асад, а ваквите вести оставија сомнение дека во Сирија има и други групи Албанци кои војуваат против Асад во Сирија./крај/мф/сн

Извор: Макфакс