Турската полиција го притворила во неделата братот на исламскиот проповедник Фетулах Ѓулен кој од 1999 година живее во доброволен егзил во САД а кого го обвинува за неуспешниот воен удар од ноќта на 15-ти јули, пренесуваат медиумите.

Кутбетин Ѓулен полицијата по дојава го пронашла во домот на негов роднина во округот Газиемир, во западната турска покраина Измир, пренесе агенцијата Anadolu.

Тој е првиот роднина на Фетулах Ѓулен кој е уапсен по неуспешниот обид за пуч. Кутбетин е обвинет за „припадност на вооружена терористичка организација“, се наведува во агенцискиот извештај и се додава дека во моментов е на испрашување во антитерористичката полиција,.

Ѓулен има пет браќа, од кои двајца е починати, и две сестри, но не е познато каде тие се наоѓаат, пишуваат турските медиуми. Во јул властите го уапсија неговиот внук Мухамед Саит Ѓулен во источниот град Ерзурум, кој се смета за центар за приврзаниците на проповедникот и средиште на неговото движење Хизмет. Уште еден внук, Ахмет Рамиз Ѓулен, беше уапсен во август во југоисточниот град Газиантеп.

Од средината на јули поради поврзаност со пропаднатиот пуч, како и поради поврзаност со организациите на Ѓулен, во Турција се приведени повеќе од 32.000 луѓе. Турција од тогаш од САД бара негово екстрадирање, и изрази незадоволство поради бавноста на процедурата околу тој процес од страна на американските власти./крај/мф/сн

Извор: Макфакс