Во воената фабрика „Слобода“ во Чачак, во централна Србија, одекна експлозија, при што се повредени двајца работници, од кои едниот има изгореници на телото, потврдија од компанијата.

РТС јавува дека 36-годишен работник добил изгореници на лицето и вратот и повреда на раката, а другиот, по прегледот, е отпуштен на домашно лекување.

Од болницата во Чачак потврдија дека работникот со изгореници е ставен на интензивна нега, а од компанијата „Слобода“ соопштија дека тој е во стабилна состојба.

„Утринава, во осум часот, дошло до технолошка експлозија на линијата на лабораторијата за артилериски гранати, во која се повредени двајца работници, на кои веднаш им била укажана лекарска помош“, соопштија од компанијата „Слобода“.

Пред три години во оваа фабрика се случија две експлозии со разлика од две недели кога беа повредени неколку работници.

Полицијата во Белград го уапсила М. М. (14), кој заедно со своите двајца другари, во парк во Белград, со закана со нож и електрошокер одзел патики од малолетни момчиња.

Како што е познато, М. М. им пришол на момчињата Г. В. (13), Л. П. (12) и В. Ж. (14) и со закана со оружје побарал да ги соблечат новите патики. Имал поддршка од своите двајца пријатели.

Случајот е во надлежност на Вишото јавно обвинителство на Одделот за малолетници во Белград.

Неофицијално, малолетникот бил сослушан во присуство на родителите.

Католичкиот училиштен центар во Зеница беше евакуиран кога училишната управа доби закана за бомба. Заканите што доведоа до хаос во училиштата во Сараево се проширија и надвор од главниот град на Босна и Херцеговина.

Портпаролот на полицијата на Зеничко-добојската жупанија, Самир Валентиќ, потврди дека информацијата за поставената бомба стигнала нешто по осум часот.

„По тоа, полицајците ги евакуирале сите ученици и почнале антидиверзантски увид“, изјави Валентиќ.

Речиси во исто време закани за бомби пристигнале и во две училишта во Сараево, па морале да ја прекинат наставата и таму, а учениците биле евакуирани.

Претходно оваа недела, сараевската полиција идентификува и приведе тројца малолетници за кои беше откриено дека испраќале закани до училиштата.

Еден од нив, како што е откриено во текот на истрагата, дури 49 пати испратил закани за бомба по електронска пошта.

По кривичната постапка, тој е предаден на Обвинителството на жупанијата Сараево. Потоа обвинителот му предложи на судијата за малолетници на Општинскиот суд во Сараево да му одреди едномесечен притвор поради сомнение за сторени кривични дела – загрозување на сигурноста и лажно пријавување.