Јужнокорејската претседатела Парк Гуен-Хи изјави во понеделникот дека нејзината земја ќе упати силен воен одговор на секоја севернокорејска провокација, без оглед на политичките последици, откако Пјонгјанг во текот на викендот објави дека „воведува воена состојба” во однос на југот.

„Доколку има какви и да се провокации против Јужна Кореја и нејзиниот народ, треба да се упати силен воен одговор, баз какви и да се политички реперкусии”, изјавила претседателката Парк Гуен-Хи по средбата со воениот врв и највисоките политички функционери на земјата, пренесува Reuters.

Западот толкуваше дека во саботата Северна Кореја влегува во „воена состојба” со Јужна Кореја, додека Пјонгјанг објасни дека Северна Кореја ќе дејствува „според законите на воена состојба” во случај на провокација против неа, која може да прерасне во „целосна” и „нуклеарна” војна, со што дополнително ескалираше нејзината воинствена реторика во однос на Сеул и Вашингтон, иако според извештаите на теренот ништо не упатува на заклучокот дека овие закани се сериозни.

Двете Кореи кои технички се уште се во воја повеќе од шест децении, откако договор за прекин на огнот беше ставен крај на Корејската војна од 1950 до 1953 година. И покрај безбројните закани последните денови од Пјонгјанг, ниту во САД не гледаат сигнали дека крајно осиромашената комунистичка земја навистина има намера да влезе во целосна војна, ризикувајќи да биде поразена од технички и воено надмоќните противници.

Тензиите на Корејскиот полуостров порасна од февруари годинава која младиот севернокорејски лидер Ким Јонг-Ун нареди тестирање, трето по ред за последните седум години, на нуклеарно оружје, со што ги прекрши резолуциите на Обединетите нации и игнорирајќи ги предупредувањата од својот единствен постојан сојузник Кина.

Во неделата САД испрати во Јужна Кореја радарски невидливи авиони од типот „F-22″ коишто ќе учествуваат во воените вежби коишто се одржуваат веќе една седмица, нагласувајќи ја американската подготвеност да ја брани Јужна Кореја каде што има стационирани 25 илјади војници. Најнапредните авиони ловци во светски рамки „F-22 Raptors” се разместени во Осан, најголемата американска воздухопловна база во Јужна Кореја, а ќе бидат поддршка на американско-јужнокорејските воени маневри.

Севернокорејскиот челник Ким Јонг-Ун на вонредна седница одржана во петокот нареди севернокорејските ракетни системи да бидат ставени во состојба на готовност за напад врз воените бази на САД во Јужна Кореја и во Пацификот. Mладиот комунистички претседател наредбата ја даде на состанокот со генералите, одржана во петокот на полноќ по неколкуте летови на американските „невидливи” бомбардери „B-2″ над Јужна Кореја и оценил дека имајќи ја предвид ситуацијата „дошло време да се решат сметките со империјалистите од САД”.

Два американски „невидливи” нуклеарни бомбардери од типот „B-2″ коишто долетале од воздухопловната база Вајтмен во американската сојузна држава Мисури изведоа во четвртокот воена вежба над Јужна Кореја. Тие летови во рамките на големите заеднички воени маневри кои секоја година ги одржуваат американските и јужнокорејските сили, според соопштението на армијата на САД, ја покажало „способноста на САД брзо и без ограничувања да изведат далекустрелни прецизни удари”. Авионите „B-2″ можат да прелетаат 11 илјади километри без полнење гориво, а наменети се за специјални задачи за стратешко бомбардирање од височини од 15 илјади метри зад непријателските линии. Носивоста изнесува 18 тони конвенционално или нуклеарно вооружување, вклучувајќи и противбункерски бомби./крај/мф/сн