Ден откако безбедносните сили ги евакуираа од џамијата Ал Фатх во центарот на главниот град Каиро којашто беше епицентарот на протестите, стотиците припадници на отстранетиот исламистички претседател Мохамед Морси, исламистите од неговото Муслиманско братство повикаа на нови протести што предизвикува стравување од нови насилства откако во претходните четири дена имаше повеќе од 750 загинати.

Вкупно се приведени 85 лица кои се забарикадираа во џамијата Ал Фатх, а безбедносните сили во саботата попладне, откако не успеаја преговорите во текот на денот, ги евакуираа, објави египетското министерство за внатрешни работи во неделата. Според Муслиманското братство, пак, во џамијата од петокот навечер имало повеќе од илјада луѓе, меѓу кои и жени и деца.

Приврзаниците на Морси кому можната и влијателна египетска армија му ги одзема претседателските овластувања на 3-ти јули, повикаа на нови протести во недела попладне, со кои би се осудил „воениот удар“.

Приврзаниците на Морси на повик на Муслиманското братство во петокот кој беше прогласен за Ден на гневот учествуваа во протестот наречен Марш на гневот против безбедносните сили кои во средата ги растурија двата кампа во коишто две седмици исламистите протестираа. Притоа во цел Египет беа убиени 578 луѓе, повеќето приврзаници на Морси, а привремената влада којашто ја постави армијата прогласи едномесечна вонредна состојба и воведе полициски час.

Се смета дека средата беше најкрвавиот ден во Египет по соборувањето на деценискиот режим на претседателот Хосни Мубарак во февруари 2011 година. Повеќе од илјада луѓе, главно исламисти приврзаници на движењето Муслиманско братство, но и христијани и приврзаници на секуларната опозиција, загинаа во безредијата од крајот на јуни, кога Муслиманското братство организираше контрапротести против опозицијата којашто бараше оставка од претседателот Морси по една година откако беше избран на протестите и кој во тој момент ја загуби поддршката на другите исламистички партии кои не произлегоа од Муслиманското братство.

Египет во времето на владеењето на Морси, освен што го продолжи економскиот пад, стана длабоко поделена земја меѓу секуларистите и исламистите чиј прв демократски избран претседател Морси кој беше обвинуван дека ја украл револуцијата од ткн Арапска пролет и води кон исламизација на земјата што ќе значи ускратувања на слободите и правата.

Сега преодната влада ја оправдува својата акција со борба против тероризмот, меѓутоа во саботата навечер најави дека за членовите на Муслиманското братство коишто не учествувале во незаконски дејствија има место во транзицијата на земјата.

Западните земји, повеќето, ги повикуваат сите страни во Египет на крајна воздржаност од насилства и зачувување на мирот, додека Боливија каде што владее левицата и комунистичка Куба репресијата ја нарекоа „геноцид“, односно ја осудија „смртта на недолжни цивили“.

Генералниот секретар на ОН, Бан Ки-Мун ја осуди претераната употреба на сила кон демонстрантите, а истото го стори и официјален Лондон. Шефот на германската дипломатија, Гвидо Вестервеле повика на „дијалог на сите политички сили“ и предупреди дека во спротивно на Египет „му се заканува граѓанска војна“. Турскиот премиер Реџеп Тајип Ердоган во саботата ги прозва Советот за безбедност на ОН, Европската унија и Организацијата за исламска соработка бидејќи не ја осудиле репресијата на егиептските власти над демонстрантите.

Јордан и Саудиска Арабија која во Египет испрати три полски болници, застанаа зад египетската привремена влада против „терористите“./крај/мф/сн