Саудиска Арабија има намера да се оддалечи од својот традиционален сојузник САД, поради политиката на Вашингтон кон Блискиот исток, смета шефот на саудиската разузнавачка служба принцот Бандар бин Султан.

Според медиумите, принцот ваквите ставови ги изрекол „во кругови блиски на политиката што ја негува Саудиска Арабија“.

Според него Саудиска Арабија им забележува на Соединетите држави, тоа што не постигнаа успех во разрешувањето на 32-месечната сириска криза и во блискоисточните судири, а покрај тоа на официјален сунитски Ријад не му е по волја ниту тоа што САД почнаа приближувања со традиционалниот регионален ривал шиитски Иран, како и затоа што не ѝ изрази поддршка на Саудиска Арабија при гушењето на протестите од 2011 година во Бахреин, рекол главниот саудиски разузнавач принцот Бандар бин Султан, чии зборови, со умисла или не, некако протекоа во западните медиуми деновиве.

Овие размисли на принцот Султан претпоставуваат и соодветни потези на Саудијците кон Вашингтон, особено во поглед на вооружувањето и трговијата со нафта.Бандар бин Султан, пред неколку денови во разговор со европски дипломати, меѓутоа за западните сојузници засега е непознато дали зад тоа стои и самиот саудиски суверен кралот Абдула.

Саудиска Арабија, на големо изненадување на земјите од регионот и Вашингтон пред десетина дена го одби членството во Советот за безбедност при Обединетите нации, образложувајќи го тоа со сопствениот револт од тоа што во него се применуваат двојни стандарди. Методите коишто ги применува светската организација, и отежнуваат напорите за ставање крај на судирите и војните, појасни официјален Ријад.

Според западните извори, Саудиска Арабија во иднина нема својата политика кон својот шиитски ривал Сирија да ја синхронизира со САД. Саудиска Арабија, како што впрочем од март 2011 година обвинува официјален Дамаск, ги поддржува сунитските бунтовници против алавитот претседателот Башар ал-Асад, кој ја обвини дека плаќа странски бунтовници и џихадисти во земјата. Сирија, исто така, го обвини Ријад дека стои зад хемискиот напад крај Дамаск кој ја донесе до кулминација на меѓународен план сириската криза. Според европски дипломатски извори, Саудиска Арабија досега наводно од обѕири кон САД не им испорачувала оружје со висока технологија на сириските бунтовници, коешто би можело да дојде во рацете на групите коишто се блиски на глобалната терористичка мрежа Ал Каеда и да претставува закана за западните цели и интереси. Ријад, очигледно, е многу разочаран од одлуката да се откаже од воената операција во Сирија, со што се закани по хемискиот напад, откако по руска иницијатива брзо беше постигнат договор до средината на 2014 година сирискиот хемиски потенцијал да биде целосно уништен.

Саудиска Арабија, исто така, стравува дека договорот меѓу Вашингтон и Техеран за контроверзната иранска нуклеарна програма, ќе оди на штета на нејзината позиција во регионот.

Инаку, со години наназад ривалството меѓу сунитската Саудиска Арабија и шиитскиот Иран придонесуваат за засилување на тензиите во целото пошироко соседство на Блискиот исток.

А до моментов, Саудиска Арабија, од стекнувањето на својата независност во 1932 година, е сојузник со Соединетите држави, при што Ријад ја ужива моќната американска воена заштита, додека Вашингтон се потпира на нафтените потенцијали на својот сојузник.

На почетокот од јуни Саудиска Арабија, направи и чекор во наметнувањето на своето влијаните и во сириската опозициска коалиција во којашто доминираше сеарапското исламистичко движење Муслиманско братство коешто го поддржува Катар, а Ријад се` поотворено се обидува да го ограничи ова влијание. Се чини оти Саудиска Арабија надвладеа над својот помал сосед Катар и ја презема ролјата на главна странска сила којашто ги поддржува сунитските бунтовници, а според западните аналитичари со овој потег би можело да се намали влијанието на исламистичките милитанти коишто ја имаат поддршката на Катар.

Иако владите во Ријад и во Доха официјално не сакаа да ги коментираат овие информации, неколку високо позиционирани извори во регионот потврдија дека несогласувањата меѓу сириските бунтовнички групи во турската метропола Истанбул, земја којашто исто така им дава силна поддршка на сириските вооружени опозициски групации, во голема мера ги одразувале борбите за превласт меѓу двете арапски монархии во Персискиот залив, во кои најпосле победила Саудиска Арабија.

Повеќето опозициски лидери сметаат дека исходот од оваа борба за превласт во контролата над сириските бунтовници меѓу Саудиска Арабија и Катар, би можело да ги зајакне можностите и на преговарачката маса и на боиштето, истовремено намалувајќи го влијанието на антизападните исламистички тврдолинијаши кои ги вооружува Доха.

Позицијата на Саудиска Арабија ја зајакна и поразот на една од таквите исламистички групации во април што на сириските владини сили им овозможи да ја преземат контролата на клучниот автопат, додека истовремено настојувањето на Катар и исламистите за надвладувањето во опозициското водство наиде на отпор од Ријад и од страна на западните сили./крај/мф/сн