Парламентот во Симпферопол упати во понеделникот на вонредна седница предлог до Русија за го присоедини Крим, досегашната јужна проруска автономна украинска република чиишто жители на референдумот во неделата со огромно мнозинство се изјаснија дека сакаат да влезат во составот на Руската Федерација како автономен субјект.

Парламентот „и’ упати предлог на Руската Федерација да го прими Крим како нов субјект со статусот на република”, се наведува на интернет страницата на кримскиот парламент, пренесува Итар-Тасс.

Кримската парламентарна делегација треба подоцна во понеделникот да отпатува за Москва за да ја разгледа постапката којашто е неопходна за присоединување на овој црономорски полуостров кон Русија. Челникот на парламентот во Симферопол, Владимир Константинов изјави дека украинските воени единици на Крим ќе бидат распуштени.

Присоединувањето на Крим на Русија го поддржаа 96,77 отсто од гласачите на референдумот што се одржа во неделата, објави во понеделникот по пребројувањето на сите гласови претседателот на Републичката изборна комисија на Крим, Михаил Малишев, истакнувајќи дека одѕивот изнесувал 83 отсто од сите речиси 1,8 милион кримски избирачи, што значи дека за присоединувањето гласале и најголем дел од етничките Украинци, кои сочинуваат 24 отсто и кримските Татари – 12 отсто од населението на полуостровот.

Околу 1,8 милиони регистрирани избирачи во јужната украинска автономна република Крим во недела гласаа на референдум за да се изјаснат каде ја гледаат својата иднина, во Украина или Русија. Врховниот совет (владата) на јужната украинска автономна република Крим, каде мнозинство се етничките Руси и русофоните а се наоѓа и седиштето на руската Црноморска флота, на 6-ти март распиша референдум на кој населението ќе одговара на две прашања: Дали сте за повторно обединување на Крим со Русија со овластувања на субјект на Руската Федерација? И Дали се за обновување на Уставот на Република Крим од 1992 година и за статусот на Крим како дел од Украина? Гласачкото ливче е отпечатено на трите јазика, руски, украински и кримско-татарски, а за решение ќе биде сметан оној одговор за кој ќе се изјаснат повеќе од половината излезени избирачи.

Уште во 1992 година требаше да се одржи референдум за тоа дали Крим ќе биде дел од Русија или од Украина. Меѓутоа, украинските власти со спречија референдумот, ги распушти тамошните органи, а тогашниот претседател на Автономната Република Крим, го отстрани од должноста, но за возврат му даде широка автономија со право на самоодлучување.

Крим останува и денес симбол на рускиот идентитет. За многу Руси овој полуостров е дел од Русија кој од 1991 година е заробен во туѓа земја. Важноста што ја има Крим за Русија од историски, културен, воен и геополитички аспект се непроценливи.

Историјата на Крим кој Русија дефинитивно целосно го завладува кон крајот на XVIII век во времето на царицата Катерина Велика, е исполнета со симболиката на рускиот идентитет од царскиот и советскиот период. Полуостровот е место и од големо културолошко значење и за Руската православна црква, каде кнезот Владимир Велики, средновековниот владетел на Киевска Русија, претходничката на модерна Русија, го примил христијанствотои го раширил меѓу својот народ. На Крим се воделе и крвавите судири во Кримските војни и во Втората светска војна.

Крим бил дел и од царска и од советска Русија повеќе од 170 години, додека советскиот комунистички челник Никита Хрушчов, етнички Украинец со указ во 1954 година не го припоил на Украина. Оттаму, многу Руси референдумот го гледаат и како моќност да се исправи она што го сметаат за историска неправда.

Украинците, пак, не мислат да го отстапат Крим и неговото присоединување кон Русија го сметаат за нарушување на нивниот територијален интегритет и суверенитет. Се откажаа од наводна воена опција за враќање под своја контрола на полуостровот, но мислат да се борат со дипломатски и политички средства. Киев, поддржан од САД и ЕУ го прогласи референдумот за нелегитимен, а вршителот на должноста украински премиер Арсениј Јаценјук изјави дека „Украина нема да ѝ отстапи ни педа земја на Русија”./крај/мф/сн